GOOD NEWS SA BYAHENG ISRAEL

Sa paghiuli sa gobernador gikan sa byahe, balon niini ang mga maayong balita pagbalik sa probinsyang Bol-anon.

Usa na niini ang oportunidad sa trabaho diin mukabat sa 10,000 ka mga skilled workers ang plano nga i-hire sa nasod sa Israel, kini maoy gibutyag sa Deputy Director for Asia and the Pacific, Ministry of Foreign Affairs, Rafael Harpaz. Ang Deputy Director nagkanayon nga ang maong job placement pinaagi sa government to government transaction. Adunay posibilidad nga mubisita and director nganhi sa nasod sa sunod nga buwan aron ipahigayon ang agreement bahin sa maong job placement.

Mitambong si Gov. Aris sa meeting sa TESDA (Technical Education and Skills Development Authority), nga gisalmutan sa mga scholars nga anaa sa Israel. Iyang nakita nga mas daghan ang makat-unan sa mga TESDA Scholars sa Bohol kung ipadala kini ngadto sa nasod sa Israel. Sa maong paagi, mas masinangkapan sa kahibalo, bahin sa teknolohiya sa mga Israeli, ang mga Bol-anong TESDA scholars ug kini dako nga tabang pagpalambo sa teknolohiya sa probinsya.

Samtang sa laing bahin, ang gobernador nakigkita usab kang Ambasador Junie Laylo sa Philippine Embassy. Nasayran nga adunay mga direct flights ang nasod sa Israel paingon sa Pilipinas. Maayo kini nga kahigayonan kung ang maong direct flights paingon sa Pilipinas, adto sa Bohol ipahigayon particular sa Bohol Panglao International Airport (BPIA). Kini, usa sa mga nauyunang plano sa ambassador samtang gipromote sa gobernador ngadto kanila ang turismo sa probinsya.

Mahinumduman nga matod pa sa gobernador, sa umaabot nga pipila ka mga buwan, posible nga adunay mga direct flights matag semana nga gikan sa China ug Japan sama usab sa kasamtangang ginaplantsa nga negosasyon sa Singapore ug Malaysia.

Dugang niini nakahinabi usab sa gobernador ang ubang mga potential business investors sa nasod. Gipahibalo ni Gov. Aris ang positioning karon sa probinsya bahin sa turismo ug patigayon. Giaghat niya ang maong mga investors sa pag tukod og mga manufacturing business sa Bohol. Malaumon ang gobernador sa mga positibong resulta sa maong business proposals.

Mahinumduman nga naunang gibisita sa gobernador niadtong milabay nga semana ang greenhouse nga gidesenyo ug giinstalar sa Metzerplas Irrigation System sa Kibbutz Metzer, aron makakuha og mga ideya nga pwedeng dal-on ngadto sa Bol-anong pagpanguma.

Kauban ni gobernador Aris ug sa delegation sa maong farm tour ang Deputy Consul-General, Ms. Ester Buzgan, ang umaabot nga Deputy Ambassador of Israel to the Philippines.

Nakahigayon usab ang gobernador, pagsubay sa kasamtangang kinadak-an nga desalination plant sa tibuok kalibutan, ang Sorek Desalination Plant. Duol kini sa Tel Aviv, Israel. Nakita didto sa gobernador ang paagi pagsupply og 150M m3/y nga tubig matag tuig ngadto sa katawhan pinaagi sa proseso nga Sea Water Reverse Osmosis (SWRO).

Sa ilang pagtuyok sa tibuok planta, daghan ang iyang nahibaw-an nga impormasyon nga pwedeng magamit sa probinsya sa Bohol kung kini adunay plano nga maghimo og susama sa Israel nga Desalination Plant.

Hinuon, isip RDC Chairman sa Central Visayas Region VII, nakita sa gobernador ang posibleng panginahanglan sa Sugbo sa maong pasilidad.

Gibisita usab ni Gov. Aris ang Sewage Treatment Plants (STP) ug gisusi ang maong teknolohiya gumikan kay nangita man usab kini og mga pamaagi nga magamit ang mga wastewater. Kung adunay matukod nga sama sa ilang STP, possible nga dugang tourist attraction kini.

Kalab-uton sa gobernador nga maaplikar ang mga mahinungdanong impormasyon gikan sa nasod sa Israel nga haom sa probinsya sa Bohol, ug tinguha niini nga adunay mamuhunan sa Bohol nga mga investors gikan sa nasod sa Israel.

Ang gobernador mipauli gikan sa Israel Marso 6, mederecho kini sa kapitolyo aron pagpahigayon ug urgent meeting sa problema bahin sa African Swine Fever (ASF).