ABANTE NEGOSYO CARAVAN ARANGKADA NA

Sa pagsugod sa Administrasyong Abante Bohol, gitutukan sa Aumentado-Balite tandem ang pagpalig-on sa mga kapanginabuhian sa katawhan. Giapil kini sa mga prayoridad isip kabahin sa mga development agenda nga gipunting masugdan sulod sa Unang Usa ka Gatus ka Adlaw sa bag-ong administrasyon.

Gipalihok sa gobernador ang Bohol Economic Development and Investment Promotion Office (BEDIPO) para sa maong tumong. Suportado kini sa Sangguniang Panlalawigan, ilabina nga ang chairmanship sa Committee on Trade and Industry, anaa kang Board Member Jiselle Rae Aumentado Villamor. Aktibo si Atty. Villamor sa pagpanday og mga balaodnon nga makahatag ug ngipon sa mga naplastar nga mga plano sa kalamboan. Ang ubang mga departamento nga may kalabutan sa panginabuhi, sama sa BEPO-PESO, PCDO, OPA, BFAR, PSWDO, ug uban pang sama niini mitambayayong aron mapangusgan ang pagmugna og mga pamaagi nga mabalanse ang ekonomiya.

Ang BEDIPO mipahigayon og mga consultative meetings ngadto sa mga LGUs kauban ang mga representante sa mga ahensya bahin sa Mandated National Services sama sa DTI, SEC, BIR, DOLE, DILG, PHILHEALTH, SSS, ug Pag-IBIG. Kini ginahimo aron pagsiguro nga mapuslan sa mga yanong katawhan ang mga serbisyo nga ginatanyag sa pangagamhanan. Ang Abante Negosyo Caravan ipahigayon alang sa paglusad sa Bohol Business One Stop Shop (BOSS) ug aron makabenipisyo ang katawhan sa mga serbisyo sa RA 11032 “Ease of Doing Business and Efficient Government Service Delivery Act of 2018.

Gihimo ang unang ABANTE NEGOSYO CARAVAN sa lungsod sa Lila niadtong Oktubre 12, 2022. Sa tema “Sayun nga Pag-Negosyo, Alang sa Lukop nga Pag-asenso”, gilusad ang Bohol Business One Stop Shop (BOSS) didto sa Lila Gymnasium. Sa tinguha nga mapaduol ngadto sa katawhan ang mga serbisyo sa gobyerno, gihatagan sa dako nga pagtagad ang implementasyon sa RA 11032 “Ease of Doing Business and Efficient Government Service Delivery Act of 2018”. Atol sa caravan, abri ang mga serbisyo sa mga partner agencies aron mapasayon ang pagparehistro sa mga bag-ong negosyante sa ilang mga negosyo apil na ang mga kapunungan ug ang mga taxpayers mahimo usab nga makapa update sa ilang status sa SSS, ug uban pang kalihukan.

Gikan sa nagkalain-laing barangay ang katawhan nga nakapuno sa mga pila para sa mga serbisyo nga gitanyag sa Abante Negosyo Caravan. Si Emma Gementiza Lague nga setenta y dos anyos ug lumulupyo sa barangay Banban, Lila, membro sa asosasyon nga Makopa Banban Irrigators Association. Mapailubon siya nga mipila ug nagpaabot sa iyang turno aron siya matabangan sa iyang tinguha nga marevive ang ilang kapunungan.

Si Gobernador Aris Aumentado, mipahayag sa iyang dakong pahalipay ug pasalamat sa Lila Mayor Hon. Arturo “Jed” Piollo II, tungod sa mainiton nga suporta sa lungsod sa Lila bahin sa Abante Negosyo Caravan. Giawhag sa gobernador ang tanang mga partner agencies nga suportahan ang mga micro small medium enteprises (MSME) ug ang tanang mga economic drivers aron mapalambo ang atong probinsya.

Ang usa ka adlaw nga kalihukan nakahatag og dako nga impact sa natad sa patigayon, ug nakaaghat kini sa gagmayng mga negosyante nga pangitaon ang ilang swerte sa nasugdan nga kapanginabuhian.