Niarangkada na sa paspas nga implementasyon sa mga proyekto ang bag-uhay pa lang natudlo ni Presidente Ferdinand R. Marcos Jr. isip kalihim sa Department of Agriculture (DA) nga si Francisco Tiu Laurel Jr.
Malampuson nga gipasiugdahan niini ang paglusad sa tulo ka mga kinauyukan nga proyekto sa DA nga mao ang Mindanao Inclusive Agriculture Development Project (MIADP), Philippine Fisheries and Coastal Resiliency(FishCoRe) ug ang Philippine Rural Development Project Scale-Up, didto sa Quezon City Nobyembre 6, 2023.
Gipanguluhan ni Gobernador Aris Aumentado ang PRDP team sa probinsya, atol sa gipahigayon nga paglusad sa PRDP SCALE-UP Project. Ang pondo niini magagikan sa World Bank.
Matod ni Aumentado diha sa iyang facebook page nga ang mga PRDP nga proyekto sa probinsya ning maong tuig, nga mga panginabuhian ug mga farm-to-market roads bilyon ang kantidad ug desidido ang Gobernador nga matiwas ug mapahimuslan ang maong mga proyekto sa katawhan.
Aprobado sa PRDP ang laing pahat para sa Bohol nga PRDP SCALE-UP sub projects diin apil kini sa mga World Bank Funded Projects nga gilusad, nagkantidad og P625,314,000 para sa Rehabilitation and Upgrading of Desemparados ( Calape)- Tabuan(Antequera) Farm-to-Market Roads with Four Bridges Calape, Bohol.
Sumala pa, nga adunay P3.1 billion nga gipaabot ang Bohol para sa tuig 2024 gikan sa PRDP.
Gipadangat ni Aumentado ang iyang mga pagpasala mat sa iyang katambayayong aron makuha ang pinakadakong pahat sa pondo gikan sa PRDP.
Kauban ni Aumentado sa maong launching ceremony sila si DA-7 RD Angel Enriquez, DA 7 RAED Chief Cirilo Namoc, Atty. Titus Vistal sa PPDO, Engr. Ronnie Bunado-PRDP Manager ug Engr. Emmanuel Caberte sa PEO.
Ang maong kalihukan gitambungan sa 600 ka mga hingtungdang partisipante gikan sa nagkalain-laing dapit sa nasod nga gilangkob sa mga inilang personalidad sa DA, mga bmag- uuma, media ug ang mga representante sa Worldbank.ALT/PIMO
No comments:
Post a Comment