BOHOL SENIOR CITIZENS NAGKATAPOK SA SC CONGRESS

Gipahigayon sa Kagamhanang Probinsyal pinaagi sa Office of the Provincial Welfare and Development (OPSWD) ang Provincial Senior Citizens Congress Nobyembre 6, isip pagtak-op sa tibuok buwan sa Oktubre nga selebrasyon sa mga senior citizens.

Kini ubos sa direktiba ni Gobernador Aris Aumentado nga ibalik ang kabibo sa senior citizens human sa pandemya, upat na ka tuig ang nakalabay.

Matod ni Vivian Dacua sa Senior Citizen Division, ang kalihukan gitambungan sa mga Federated Presidents sa nagkalain-laing lungsod ug mga presidente sa senior citizens sa 1,109 ka barangay tibuok Bohol.

Sa ilang tema nga "Pagpasidungog sa mga Bililhong Kabilin sa mga Pilipinhong Tigulang", gisugdan ang kalihukan pinaagi sa paghalad og santos nga misa ug ang gikamingawan sa mga tigulang nga zumba didto sa Bohol Cultural Center, dakbayan sa Tagbilaran.

Gipadangat sa Gobernador ang iyang pahalipay ngadto sa mga Senior Citizens sa padayon nga kalig-on ug kadasig niini taliwala sa daghang nangagi nga pagsuway. Gipahibalo usab ni Aumentado pinaagi sa iyang facebook account nga ang tabang alang sa mga senior citizens nga iyang gipanghatod sa nilabay nga mga buwan paga-umentuhan sa sunod nga tuig.

Nihatag og mensahe sa pag-abiabi si Delia Quiao, ang BFSCAP secretary.

Gisundan kini sa pahimangno bahin sa Health and Wellness gikan kang Jeanine Borromeo ang Nurse III sa PHO.

Mabulukon ang gipaambit nga kaalam sa keynote speaker nga si Daisy Lor, ang Regional Focal Person on Elderly Program sa DSWD Field Office VII, diin naghisgot kini sa pagpaubos, pagpasaylo ug pagpuyo nga malipayon.

Samtang sa laing bahin, gihatagan og pasidungog ang kasamtangan nga oldest living centenarian nga taga Antequera, si Sixto Tabaranza, diin gidawat kini sa OSCA Head nga si Firma Parido ug Federated President nga si Dulzora Tabaranza, iya ra usab nga kadugo.

Si Tabaranza nakadawat og P100k gikan sa kagamhanang Probinsyal ug laing P100K gikan sa Nasyonal isip pahalipay kaniya. Wala nakatambong si Tabaranza sa okasyon gumikan sa katigulangon apan nagpadala kini og video message.

Ang mga Local Government Units gihatagan usab og mga sertipiko isip pagdayeg kanila sa ilang mga programa alang sa Senior Citizens.

Gipahigayon ni Bise Gobernador Dionisio Victor Balite ang pagpapanumpa sa mga bag-ong opisyales sa Office of the Senior Citizens Affairs (OSCA) nga gipanguluhan sa ilang presidente nga si Gualberto Jaspe, uban ang paghatag sa iyang mensahe.

Si Board Member Lucille Lagunay nihatag sa iyang mensahe sa pagdasig ngadto sa tanang mga senior citizens ug mga pagdayeg sa dako nga gikatampo sa katigulangan pagpalambo sa komunidad.

Apil sa mga nihatag usab og mensahe mao sila Atty. Abel Damalerio, representante ni Congressman Edgar Chatto. ug Mr. Rey Casiñas, representante ni Congresswoman Alexie Tutor.

Kahinumduman nga ning tuig 2023 nikabat og P1,920,000. ang nahatod sa Gobernador ngadto sa tagsa-tagsa ka lungsod isip tabang pinansyal gikan sa iyang buhatan alang sa mga senior citizens. ALT/PIMO