3,000 KA TRABAHANTE SA BPO, UBAN PANG MGA KALAMBUAN GITUKI ATOL SA FLAG CEREMONY

Usa ka business process outsourcing (BPO) nga ablihan dinhi ang nagkinahanglan og mokabat mga 3,000 ka mga empleyado sa pagsugod sa pamatigayon dinhi.

Gipahibaw kini ni Gobernador Erico Aristotle Aumentado atol sa gipahigayon nga flag ceremony adlawng Lunes Pebrero 5.

Matud pa sa gobernador nga gikinahanglan kini atol sa pagsugod sa operasyon dinhi sa lalawigan sa BPO nga Sagility.

Pagatukuron sa Sagility ang ilang buhatan sa Old Airport og tinguha niini nga magsugod ang operasyon sa tuig 2024.

Haom ang maong trabaho alang sa mga estudyante, nurse, bag-ong migradwar o wa pa maka-board gumikan kay mahitungod sa panlawas ang pagatukuron sa Sagility.

Sa laing katikaran, gikatakda nga makigtagbo si Aumentado ug sa mga mayor sa kalungsuran ug sa dakbayan sa Tagbilaran dinhi sa Kapitolyo.

Kini may kalabutan sa gipagawas ni Aumentado nga memorandum circular No. 1 aron paluyuhan ang iyang tinguha nga kombisihon ang tanan nga mga hepe ehekutibo.

Tumong niini nga buhion ang joint memorandum circular (JMC) No. 3 tali sa Department of Agriculture, Department of Trade and Industry, Department of Health, Department of Interior and Local Government ug Department of Environment and Natural Resources.

Ang JMC 3 nga gipakanaog tuig 2020 nagduso sa bantay-presyo sa Municipal Price Coordinating Council.

Si Aumentado nagkanayon nga dili igo ang gahom sa kapitolyo pagsumpo sa naglihok ug nagsaka nga presyo sa palaliton partikular sa isda.

Namahayag ang gobernador nga gikinahanglan sa kapitolyo ang pagtambayayong sa mga local chief executives sa pagtubag sa problema bahin sa presyo sa mga isda.

Sa laing bahin, si Aumentado nagkanayon nga iyang nakahinabi si General Romeo Brawner, hepe sa Armadong Kusog sa Nasud ug iya kining gipahibaw nga apektado ang Camp Bernido sa gipahigayon nga pagpalapad sa kalsada sa Hangos St. dinhi sa Tagbilaran.

Plano sa gobernador nga ang maong kampo sa mga military reservist ibalhin sa mas lapad ug mas tukma nga dapit alang sa maong katuyuan.

Gipahibaw usab sa gobernador nga kasamtangan nga ginaplastar ang plano sa pagbutang og hospital sa lungsod sa Loay. Kini aron mapasayon pag-atiman sa mga biktima sa aksidente sa mga dapit tunga-tunga sa Tagbilaran ug Carmen ingon man sa Tagbilaran ug Jagna.

Matud ni Aumentado, adunay investor nga desidido mamuhunan niini ug ang ila lamang gipangayo sa kagamhanang probinsyal mao ang mga taw nga mutrabaho sa maong konstruksyon.

Gipahibaw sa gobernador nga ginapahiluna usab sa iyang administrasyon ang pagtukod og satellite nga kapitolyo didto sa Ubay human nakahukom ang lungsod sa Ubay nga magtukod og bag-ong munisipyo.

Tungod kay didto na sa maong munisipyo pagahimuon ang ilang mga transaksyon, ang ilang biyaan nga dapit ihatag ngadto sa kagamhanang probinsyal.

Gipasabot ni Aumentado nga ang maong desisyon agi og tubag sa mga reklamo sa katawhan sa segundo ug tersero distrito nga layo kaayo ang kapitolyo karon alang kanila.

Atol sa maong pakigpulong, gisubay usab sa gobernador ang mga taho sa buhatan sa Provincial Human Resource Department pinaagi ni Anne Mariquit Derikito-Oppus, ug sa Bohol Provincial Tourism Office pinaagi sa OIC Joanne Pinat.

Nagpadayag og kalipay si Aumentado sa balita gikan ni Provincial Administrator Asteria Caberte nga ipahigayon niadtong adlawa ang soft opening sa food court sa Kapitolyo. PIMO/ALT