GROUNDBREAKING SA TROPICAL FRUIT SCION GROVE AND PLANT NURSERY GIPAHIGAYON SA DIMIAO

Dimiao, BOHOL — Andam na ang Kagamhanang Probinsyal sa Bohol sa pagpatukod sa Visayas Tropical Fruit Scion Grove and Plant Nursery cum Provincial Coconut Seed Garden sa Barangay Baguhan ug Barangay Pagsa, Dimiao, human gipahigayon ang ground breaking ceremony niini Agosto 29, sa pagpangulo ni Gobernador Erico Aristotle Aumentado.

Kauban sa gobernador sila si Dimiao Mayor Randolph Ang ug Philippine Coconut Authority (PCA) Provincial Manager Jovencio Feliselda.

Mipadangat sa suporta, pinaagi sa ilang presensya sa maong seremonya, si Provincial Administrator Asteria Caberte, OPA Assistant Agriculturist Larry Pamugas, DA PATTCO Roman Dabalos, Baguhan Punong Barangay Mario Lagura, Pagsa Punong Barangay Eric Adaya, ug uban pang opisyales.

"Magpasalamat kita sa Labaw'ng Makagagahom nga sa atong mga damgo, sa atong mga plano, Iya tang gigiyahan inubanan nga nagkahiusa ang atong mga hunahuna karong panahona,” matud ni Gov. Aumentado sa iyang mensahe.

Gipasalamatan usab niini si Mayor Ang sa mainitong suporta ngadto sa Strategic Change Agenda ning iyang ikaduhang termino diin nagtumong kini sa pagpalig-on sa agrikultura.

Ang proyekto nga ipahimutang sa 50 ka ektarya nga luna nga gitanyag sa Dimiao, gigahinan sa Kagamhanang Probinsyal pinaagi sa OPA sa pondo nga nagkantidad og P16.5 million.

Kini ang unang higayon nga ang lalawigan makabaton sa pasilidad nga mutubag sa panginahanglan sa mga mag-uuma ug mga farmer enthusiasts sa kalidad nga mga planting materials sama sa mga fruit tree seedlings, lubi, orchids, mga pananom nga mubuwak, ug mga piniling lagutmon.

Kahinumduman nga ang mga mag-uuma didto sa Mindanao mangita og maayong klase nga mga binhi pangtanom gumikan kay ang Bohol walay igong kapasidad kaniadto alang sa maong panginahanglan.

Si Marjoe Rey Labonite sa OPA Agri Facilities Division nagkanayon nga ang mga mother plants nga ipangtanom sa 20 ka ektarya nga fruit scion grove and plant nursery, accredited sa Bureau of Plant Industry (BPI).

Sa laing bahin, ang PCA mupili sa haom nga dapit alang sa lubi, sulod sa dugang 30 ka ektarya nga luna, diin didto ipahimutang ang Provincial Coconut Seed Garden.

Si Feliselda, kinsa namahayag usab sa suporta ngadto sa proyekto nga gitinguha sa gobernador, nagkanayon nga dili ang tibuok 30 ka ektarya tukma nga pagatamnan og lubi apan paningkamutan nga makapananom og daghan nga maoy magsilbi nga source kun tinubdan sa binhi, diin ipahiluna kini sa 8 meters by 8 meters nga sukod matag punuan.

Matud pa nga andam ang ahensya pag-provide sa technical nga suporta ug mga lubi nga itanom isip seed source alang sa maong Provincial Coconut Seed Garden.

Ginatan-aw usab ang posible nga pagsuporta og mga fertilizer kung aduna pa'y pondo, aron makuha ang target nga tulo ka tuig gikan pagtanom mamunga na ang mga dwarf nga mga lubi nga ipangtanom.

Ang maong lakang tukma sa tumong sa gobernador nga panghingusgan ang agrikultura sa lalawigan pinasikad sa gimugna nga Executive Planning Committee (EPC), pinaagi sa gipakanaog nga Executive Order No. 1, Series of 2025.

Gawas sa gipahigayon nga capsule laying ceremony, gipanguluhan usab sa gobernador ang pagpananom sa mga lubi ug prutas sama sa nangka ug manga nga gikan sa Bohol Experiment Station, usa ka buhatan gikan sa DA VII. (PIMO/ALT)