Mikabat sa 2,659 ka mga Bol-anon ang nakapamalit sa tag-napulo ka kilong bugas nga tag P20 matag kilo ubos sa P20 Benteng Bigas, Meron Na Program (PBBM) sa administrasyon ni Presidente Ferdinand R. Marcos Jr. diin opisyal nga gilusad kini didto sa Bien Unido Municipal Gymnasium, Septyembre 5.
Personal nga gitambungan sa Presidente ang kalihukan uban ni Department of Agriculture (DA) Secretary Francisco Tiu Laurel Jr., DepEd Secretary Juan Edgardo "Sonny" Angara ug DA VII Regional Director Angel Enriquez, inubanan sa Gobernador sa Bohol Erico Aristotle Aumentado ug Bien Unido Mayor John Felix Garcia.
Nauna nang gipahigayon ang mubo nga programa diin sa ngalan sa gobernador, gipadangat ni Provincial Administrator Asteria Caberte ang mensahe sa pasalamat ngadto sa Pangagamhanang Nasyonal sa P20 Rice Project launching.
Uban sa NFA Administrator nga si Larry del Rosario Lacson, Food Terminal Inc. CEO Joseph Rudolph Lo, mga ka-partner ning maong programa ug ang mga asosasyon nga midawat sa mga ayuda sa Kagamhanan, gipadangat ang mga pagpasalamat ug pag-ila sa tabang gikan sa gobyerno.
Matud sa Bien Unido Municipal Agriculturist Rosamia Tutor, nga adunay 80 ka asosasyon gikan sa 15 ka barangay apil ang kaislahan sa Bien Unido, ang mikomitar pagsaksi sa kalihukan.
Nagpasalamat ang Gobernador nga atol sa roll out, nadawat sa mga asosasyon sa Agri-fishery ug mga marginalized sectors ang interventions gikan sa nagkalain-laing ahensya.
Matud pa, nga suportado kini sa Kagamhanang Probinsyal aron mas mapadali nga matagamtaman sa mga Bol-anon ang mga serbisyo gikan sa Nasudnong Pangagamhanan. Panglantaw niini nga dili lang ang Bien Unido ang makabenepisyo sa tag 20 nga bugas kundili apil ang ubang lungsod.
"Syempre andito inyong Governor marami ring programa. Para pagandahin ang presyo ng palay, makapag-avail doon sa subsidy sa National Government, para maipagbili ng bigas. Ito po (bigas) ay hindi galing labas ito, galing ito sa Bohol sa mga magsasaka dito," matud sa presidente uban ang pagdayeg ngadto sa Gobernador tungod sa mga programa niini pagpalig-on sa agrikultura sa lalawigan.
Kahinumduman nga ang administrasyon ni Aumentado aktibo sa programang palay buyback ug sa pagpamaligya sa maong mga humay sa ubos nga presyo.
Gihulagway ang paglusad nga " P20 nga bugas, saad nga natuman" diin pinaagi sa KADIWA ng Pangulo, isip flagship program sa DA, gatusan ka mga vulnerable individuals sama sa senior citizens, persons with disabilities, 4Ps beneficiaries, solo parents, mag-uuma, mananagat ug mga indigenous peoples ang nakapahimulos sa pinakabarato nga bugas sa nasod.
Samtang sa laing bahin, ang Bureau of Fisheries and Aquatic Resources (BFAR), ubos sa pagdumala sa Regional Director Mario Ruinata, ug Provincial Fishery Officer Candido Samijon, adunay mga ayuda nga giturn-over ngadto sa mga fisherfolks associations nga nagkantidad og P11,793,974.77.
Pipila nini mao ang mga seaweed farm implements P2.6 million, Seaweed Food Vending Cart P1.2 million, Seaweed Nursery P4.5 million tanan, 16 ft non-motorized ug 26 ft motorized boats.
Si Reymundo Gimenez RCEF Focal-VII sa PhilMec kun Philippine Center for Postharvest Development and Mechanization nagkanayon nga mikabat sa P8.8 million ang kantidad sa upat ka four-wheel drive tractor nga ilang gitugyan ngadto sa LGU ug sa tulo ka asosasyon.
Ang presidente sa SAAD kun Special Area for Agriculture Development sa Nueva Estrella, Bien Unido nga si Roberto Mangapuro, kinsa benepisyaryo sa mga programa, nagpasalamat sa DA, BFAR, ug sa Kagamhanang Probinsyal sa pagsuporta ngadto sa mga mag-uuma.
"Ipadayon Gov. ang inyong tabang sa mga farmers. Salamat DA, BFAR kay ang SAAD dako og gikatabang sa amoang panginabuhi," matud ni Roberto.
Si DA Regional Director-7 Angel Enriquez nagkanayon nga dako og bentaha ang interventions sa Gobyerno sa mga farmers ug fisherfolks pinaagi sa SAAD kay ang mga recipient mismo ang nag-identify sa haom sa ilang panginahanglan.
Insurance ang dala sa Philippine Crop Insurance Corporation (PCIC), ubos sa pag-aproba sa Regional Manager Paulita Secuya adunay balor og Php23,292,300 ang kantidad sa livestock claims alang sa mga hog raisers nga naapektuhan sa ASF.
Mitambong sa maong kalihukan sila si Vice Governor Nicanor Besas, mga bokal Nathaniel Binlod, ug Dionisio Joseph Balite, PA Asteria Caberte, ug Chief of Staff Atty. Filipina Piollo.
Gidumala sa Kapitolyo ang pagpamaligya sa bugas pinaagi sa Governor's Office, Office of the Provincial Agriculturist, Provincial Social Welfare and Development Office, Provincial Treasurer's Office, uban ang LGU-Bien Unido.
Gisuportahan kini sa mga mayor ug ubang opisyales sa kalungsuran ug mga kabarangayan.
Mikabat na sa 223 ka mga dapit sa nasod ang nakatagamtam sa programa ug gilauman nga makaabot kini sa 15-M ka households sa sunod tuig.PIMO/ALT
No comments:
Post a Comment