IKA-127 NGA ADLAW NI CPG GISAULOG SA BOHOL CULTURAL CENTER

Gisaulog sa lalawigan sa Bohol ang adlawng natawhan ni kanhi Presidente Carlos P. Garcia pinaagi sa pagpasidungog sa mga Bol-anon nga dako og gikatampo ning tuiga sa mga kalampusan sa lalawigan.

Ubos sa pagdumala ni Gobernador Aris Aumentado, malampuson ang kasaulogan sa ika-127 nga Carlos P. Garcia Day diin gipahigayon adlawng Sabado,Nobyembre 4, sa Bohol Cultural Center, dakbayan sa Tagbilaran.

Ang kasaulugan sumala sa Republic Act No. 7448 nga nagdeklarar sa Nobyembre 4 isip usa ka Special Non-Working Holiday sa lalawigan sa Bohol.

Kini aron paghatag og higayon sa tibuok lalawigan sa paghandum sa iyang adlaw'ng natawhan.

Si kanhi Pangulo Garcia, nga mas nailhan nga CPG, nahimong senador ug bise presidente human nagsilbi sa Bohol.

Nilingkod sya isip pangulo hulip kang Pangulong Ramon Magsaysay tuig 1957 tungod sa kamatayon niini.

Ang kasaulogan gisugdan pinaagi sa paghalad og mga buwak didto sa Pres. CPG Monument, Capitol Grounds.

Gisundan kini sa programa didto sa Bohol Cultural Center.

Nihatag sa mensahe pagbukas niini si Bise Gobernador Dionisio Balite.

Pinakadugokan sa kasaulogan mao ang pagpasidungog sa mga atleta, top notchers ug uban pang mga Bol-anon nga nagmalampuson sa nagkalain-laing natad.

Uban sa mga bokal sa Sangguniang Panlalawigan, adunay duha ka matang sa pasidungog nga gitunol ni Aumentado ug Balite ngadto sa 32 ka mga Bol-anon nga nakit-ang talagsaon an katakos.

Kini mao ang Carlos P. Garcia Excellence Award ug Governor's Testimonial Of Recognition.

Nidawat sa CPG excellence award sa Culture, Arts, and Design sila si Michael Yu and Joseph Ven Garay Dumadag sa Blue Grass Project, Best Creative Design Awardee sa 12th International FDSS Floral Design Competition didto sa Singapore ug isip Grand Winner sa 2023 Hong Kong Flower Show for Unique Feature-International Category; ug EJ Relampagos, "First Boholano Fashion Designer in history to show in the prestigious Milan Fashion Week in Italy and the only Filipino to be part of the MFW's International Fashion Designers Gala of the September 2023 Edition".

Samtang sa kategorya sa Academe sila si: Medy Gucaban, Team Leader, Jerome Manatad, Team Adviser ug Fablab Bohol Director; Jocelyn Faith Pozon ug Kenn Bantugan, Bohol Team Members Island State University Main Campus nga nahimong Grand Champion sa Chronics 2023 Southeast Asian Product Design and Ergonomics Competition sa Yogyakarta, Indonesia.

Sa sports, gipasindunggan sila si Raymund Uy, Hall of Famer sa Abbott World Major Marathon Six-Star Finisher during the 127th Boston Marathon; Vanessa Sarno, Gold Medalist sa 2023 Asian Youth and Junior Weightlifting Championships sa Gautam Buddha University. Greater Noida, India.

Sa laing bahin, Tourism Sector Champions sila si Bob Nicomedes G. Cal, "Father of the Loboc River Cruise"; The Bellevue Resort; Modala Beach Resort; Hennan Resort Alona Beach; Bohol Beach Club; Amorita Resort; Best Western Plus Iwywall Resort; ug Bluewater Panglao.

Ang gipasidunggang mga media practitioners sila si Fred Araneta, manlalaban Danilo Bantugan, Mr. Pedro Bolanio, ug Antonieto Pernia nga girepresentahan sa iyang anak nga si Marc Anthony Pernia, ang admin Officer sa PIMO.

Ang Community Champions sila si George Dennis Drake, Founder sa the International Deaf Education Association Philippines; The Bohol Chronicle, The Bohol Tribune, The Bohol Times ug Bohol Balita Daily News.

Gipasidunggan isip Business Sector Champions ang Alturas Group of Companies ug Bohol Quality Corporation.

Samtang nakadawat sa Governor's Testimonial of Recognition sila si Mark Jay A. Butron, Bohol Island State University Main Campus, 9th Placer sa Registered Master Electrician Licensure Examination; Mark Darel B. Saligumba, BISU-MC, 9th Placer, Registered Master Electrician Licensure Examination; ug Janry Miles B. Hamili (BISU-MC, 10th Placer, Registered Master Electrician Licensure Examination nga nakadawat og P50,000 gikan sa lalawigan.

Si Kristoffer B. Del Pilar, 4th Placer, 2023 Real Estate Appraiser Licensure Examination nakadawat usab og P75,000.

Ang maong kalihukan gitambungan sa mga nagkalain-laing sektor sa katilingban, mga opisyales, personalidad sa media ug uban pa nga haligi sa lalawigan.

Sa iyang mensahe, gipasabut ni Aumentado nga ang CPG DAY adlaw sa pagpamalandong, pagsaulog ug pagdasig sa komunidad gumikan sa hiniusa nga tumong subay sa ehemplo sa tinahud nga kanhi Pangulo sa Nasod Carlos P. Garcia.ALT/PIMO