"Ang Bohol Cultural Center napuno sa 600 ka mga representante sa nagkalain- laing kooperatiba sa lalawigan", kini mao ang pasiunang pagdayeg nga mensahe, ni Senador Ronald Dela Rosa atol sa iyang pagtambong sa selebrasyon pagtak-op sa Buwan sa Kooperatiba, ning ika-27 sa Oktubre, sa Bohol Cultural Center.
Pinasidunggan nga bisita sa selebrasyon si Sen. Ronald "Bato" Dela Rosa. Membro kini sa komitiba sa Senado bahin sa kooperatiba.
Gikalipay ni Sen. Bato ang imbitasyon kaniya sa Kagamhanang Probinsyal sanglit, buot usab sa Senador nga ikauban usab ang iyang mga kaliwatan sa Bohol partikular sa Antequera, nga bisperas sa kapistahan sa maong lungsod.
Si Gobernador Aris Aumentado, namahayag ngadto sa Senador sa iyang pasalamat sa pagtambong niini sa kalihukan.
Ang Regional Director sa Cooperative Development Authority (CDA) nga si Cristina Villamil nagpadangat usab sa iyang pasalamat sa Senador tungod sa dako niini nga suporta pinaagi sa Senado, alang sa mga kalihukan sa Bohol mahitungod sa kooperatiba.
Samtang sa laing bahin, gidayeg ni Villamil ang mga inisyatibo ni Gobernador Aris Aumentado pagpalig-on, sa mga programa nga nakatabang sa mga membro sa kooperatiba.
Gikalipay ni RD Villamil ang pag-ila sa Gobernador nga ang mga kooperatiba haligi sa pagpalambo sa lalawigan.
Matod ni Villamil nga kini ang hinungdan nga gipaningkamutan sa Gobernador nga makabaton sa kaugalingong buhatan ang Provincial Cooperative Development Office ( PCDO)nga karon gidumala ni Ma. Conrada Fuentes, aron ang PCDO makatutok sa mga panginahanglan pagpauswag sa mga kooperatiba.
Pagdugang sa Regional Director, si Bise Gobernador Dionisio Victor Balite dako usab og partisipasyon uban ni Board Member Lucille Lagunay ( PCDC Chairman) ug ang Sangguniang Panlalawigan sa maong pagbutang og buhatan kay gipalig-on niini ang mga plano sa Gobernador para sa mga kooperatiba pinaagi sa mga resolusyon nga nagagikan sa SP.
Malaumon ang Gobernador nga mas daghan pang kalamboan ang maangkon sa mga membro sa kooperatiba gumikan sa ilang pagkahiusa nga matabangan ang mga Bol- anon pinaagi niini.
Nitambong usab sa Culmination Program si former Usec. Art Evangelista isip pagsuporta sa maong kalihukan.ALT/PIMO
No comments:
Post a Comment