KAPULISAN GILUWAS ANG NAKIDNAP NGA BABAYENG INSIK, GOV. AUMENTADO MAPASALAMATON

Usa kababaye'ng Insik nga 53 ang panuigon ug lumulupyo sa Jiangsu Province, China, ang katapusang nakit-an sa Lungsod sa Dauis Oktubre 18.

Sumala sa inisyal nga taho, gidagit kini sa upat nga kaliwat ra usab niya Insik uban sa duha ka Pinoy nga gikan sa kaulohan. Ang anak sa biktima, gipangayuan sa sindikato og lukat nga P25 Milyones.

Nahidangat kining maong kasayuran ngadto sa Panglao Municipal Police Station, Oktubre 23, adlaw'ng Lunes.

Abtik nga nagpahigayon ang Bohol Provincial Police Office (BPPO) uban sa Provincial Intelligence Unit ( PIU) og imbestigasyon.

Agresibo ang hiniusang pwersa sa mga alagad sa kalinaw pagluwas sa maong Chinese National, busa gilusad ang operasyon Oktubre 24, alas 8:45 sa kabuntagon didto sa Poblacion Panglao, Bohol.

Wala hatagi og gimtang pagsukol ang mga kidnapper og gisakmit gikan kanila ang napalgan nga armas diha sa ilang posisyon nga 2 ka 45 kalibre nga pistula ug 2 ka sakyanan, diin usa niini gipanag-iya sa biktima.

Ang naaresto nga mga personalidad mao sila si( pulos dili tinuod nga ngalan):

1.Ming (Chinese National) legal age, nagpuyo sa Ermita, Manila

2. Nok (Chinese National), 34 years old, single, taga Shichuang Nan Chong;

3. Wun (Chinese National), 33 years old, single, nagpuyo sa Jianshu Wuxi;

4. Nung (Chinese National), 34 years old, married, lumulupyo sa Quizhou Biyie;

5. Ben, Filipino, 25 years old, single, taga Sta. Mesa, Manila;

6. Jag, 23 years old, single, nagpuyo sa Pasay City, Manila.

Ang malampusong operasyon gilangkob uban sa PIU BPPO, PMFC, Panglao MPS, Dauis MPS, PIT-Bohol uban sa Regional Intelligence 7 ug AKG ubos sa liderato sa RD PRO 7.

Si Gobernador Aris Aumentado human masayri ang maong pagsikop sa sindikato, midali pagsubay sa panghitabo. Gipadangat niini ang mainitong pahalipay sa katakos sa maong operatiba ug ang kinasingkasing pasalamat kanila ug midason nga pasakaan sa tukma nga kaso ang mga nadakpan.

Kasamtangan usab nga gipahimutang ang koordinasyon ngadto sa Chinese embassy ug DFA alang sa maayo ug luwas nga pagbalik sa maong babaye ngadto sa iyang nasod.

Sa makausa pa, gipasalig sa Gobernador nga diha sa paghiusa ug pagtinabangay sa mga hingtungdan, sa kanunay kontrolado sa Pangagamhanan ang sitwasyon. ALT/PIMO