BILAR - Pormal nga gidawat sa Bilar National High School ang bag-ong nahuman nga covered court gikan kang Gobernador Aris Aumentado sa seremonyas nga gihimo niadtong Oktubre 20.
Gisaksihan sa mga ginikanan, tinun-an ug magtutudlo sa tunghaan nga nahimutang sa Barangay Yanaya ning lungsod ang pagturn-over nga gipangulohan mismo sa gobernador.
Ang maong benepisyo nagkantidad og P6 milyones gikan sa Special Education Fund.
Giangkon ni Aumentado nga ang maong proyekto gisugdan sa kanhi administrasyon og mahimong di niya ipadayon kon wa kini masibo sa iyang development plan.
Hinuon, giklaro sa gobernador nga mas mahinungdanon kaayo alang kaniya ang interes sa kadaghanan.
Matud ni Aumentado, di niya pakyason ang katawhang Bol-anon ug nasayod siya nga naglaom niini ang mga Bilarnon.
Lakip sa mitambong sa maong seremonyas sila si Bilar Mayor Norman Palacio, School Principal Felicidad Alipe EdD, Ma. Lileth Calasat PSDS, PTA President Gregorio Petalcorin, Provincial Engineer Camilo Gasatan ug former Principal Marlon Jala.
Atol sa maong kalihukan, gipahigayon usab ang pagpanumpa sa katungdanan ang mga opisyales sa kapunongan sa mga ginikanan sa nahisgutang tunghaan. (PIMO/ALT)
No comments:
Post a Comment