PANUMPA SA 61 FORMER REBELS GIPAHIGAYON SA HINIUSANG MITING SA PPOC UG PADAC

Nagpadayag sa iyang kalipay si Gobernador Aris Aumentado sa pagbalik sa sabakan sa balaod sa 61 ka mga giila nga mga rebelde.

"Makalipay sa dughan nga 61 ka CPP/NPA/ NDF mi surrender nato karong adlawa. Salamat sa pagsalig sa among administration," matud pa sa gobernador sa iyang Facebook account.

Si Aumentado personal nga nangulo sa seremonyas sa pagdawat sa mga kanhi sakop sa kalihukan inabagan ni Bise Gobernador Dionisio Victor Balite.

Ang seremonyas kabahin sa gihimong hiniusang tigum sa Provincial Peace and Order Council ug Provincial Anti Drug Abuse Council sa Kapitolyo niadto Oktubre 18.

Sa laing bahin, mokabat ngadto sa 10 ka mga kapunungan ug organisasyon ang natumbok nga maoy kanhi gisakupan sa mga nibalik sa balaod.

Pipila niini mao ang Bol-anong Artista na May Diwang Dagohoy (BANSIWAG), Bol-anong Kahugpungan ng Kilusang Nangingisda (BOKANA), Sandigan sa Bol-anon Kababayen-an ang mag-uuma ug Nangingisda(SABAKAN), Hugpong Mag-uumang Bol-anon ( HUMABOL), Talibon Trinidad Integrated Farms (TTIF ), Kabatan-onan Para sa Kalamboan sa Nasod (KAPAKANAN) ug Communist Party of the Philippines.

Nasayran nga sa maong mga KR ang uban niini, lumulupyo sa Trinidad, ang uban sa Candijay, sa Mabini, Carmen, Bilar, Catigbian, Alicia, Guindulman ug Talibon.

Matod pa, ang maong mga kanhi rebelde andam na nga ipadayag sa publiko ang ilang matuod nga pagkatawo.

Sa 63 ka mga kanhi rebelde nga nakahukom sa kompleto nga pagbiya sa maong ideolohiya, 61 ang nakig-atubang sa gobernador ug gipahigayon ang Oath of Allegiance.

Si Mita Tecson, hepe sa Office of Provincial Social Welfare, nipahibalo kang Aumentado nga adunay duha ning maong grupo nga kanhi aktibong sakop sa Bohol Party Committe ang mitahan og armas nga 38 nga revolver.

Si Aumentado nagpadayag kung unsa ka mahinungdanon alang kaniya ang mga nagrebelde sa nakalabay nga administrasyon nga mubiya na sa walhong grupo.

Si Aumentado ug Balite nikomitar paghatag sa P10,000 sa matag usa, gitagana alang sa mga kanhi rebelde.

Malaumon ang kagamhanang probinsyal ubos sa renda sa administrasyong Aumentado-Balite nga matuldukan na ang hulga sa insurhensiya gumikan sa sunod-sunod nga pagduol sa mga kanhi aktibo sa kalihukan ngadto sa pangagamhanan.ALT/PIMO