Namahayag si Gobernador Aris Aumentado nga dako niyang garbo isip representante sa 1.3 Milyones nga katawhang Bol-anon ang pagpahigayon sa opisyal nga pag-abli sa Department of Education (DepEd) National Teacher's Month diin ang probinsya mao ang host sa rehiyong kabisayaan. Gipahigayon kini didto sa Bohol Wisdom School Gymnasium, Septyembre 5, 2023.
Sumala sa DepEd Secretariat Evelyn Codilla, kapin sa dos mil ka mga magtutudlo gikan sa Region VIII, VII ug VI ang mitambong sa kalihukan diin ang Bise Presidente ug DepEd Secretary Sara Duterte mao ang Keynote Speaker sa maong programa.
Ang Bise Presidente nipadangat sa iyang pasalamat kang Gobernador Aris Aumentado sa pagdawat ug sa malampusong selebrasyon sa maong National ug World Teacher's Day.
Nagpasalamat usab kini sa mga opisyales sa Kagamhanang Probinsyal ug sa katawhang Bol-anon sa suporta ngadto sa administrasyong Marcos ug Duterte.
Gihisgutan sa DepEd Secretary ang bahin sa bag-ong gilusad nga MATATAG Curriculum diin nagtutok kini sa pagpasayon sa kasamtangan nga curriculum sa K to 12 uban sa subli nga pagpahiluna sa Good Manners and Right Conduct (GMRC) ug Values Education Act isip pagtukma sa edukasyon ngadto sa 21st Century nga mga magtutuon.
Gipahibalo ni Secretary Sara nga mu-issue ang ilang buhatan sa interim guidelines nga magapakunhod sa 56 ka mga administrative tasks ngadto sa 11 na lamang aron makuhaan ang mga buluhaton sa mga magtutudlo.
Matod ni Bise Presidente nga dili standard ang sistema sa Basic Education and Information System (BEIS) sa pagkakaron nga bisan gani ang mga gipangbutang sa mga bungbong sa matag classroom angay repasuhon kung nakatabang ba kini sa edukasyon sa mga kabataan, kay dili lamang nga naghatag kini og kabug-at ngadto sa bulsa sa mga magtutudlo, posible nga dili makatabang sa edukasyon sa mga kabataan nga linghod pa ang mga hunahuna.
Nakapahupay sa mga magtutudlo ang pag-pahibalo sa DepEd Secretary nga gitutukan usab sa ilang buhatan ang pagpagaan sa mga problema sa mga magtutudlo kabahin sa GSIS nga mga loans ilabina kadtong mikabat na kini sa dagko nga mga interest. Adunay abogado nga mahimo maduolan kung ang mga magtutudlo adunay suliran bahin niini.
Ipatuman usab ngadto sa mga magtutudlo ang pagpanghatag og 30 ka adlaw nga ensaktong pahuway sa pagtak-op sa klase.
Mas nakapalipay sa tanang mga magtutudlo nga nitambong sa kalihukan, ang pagpahibalo nganha kanila nga ang tanan nga mitambong sa maong National Teacher's Day Kickoff adunay cash, usa ka libo ka pesos nga madawat apil na ang bugas, pinaagi sa pagpahiluna niini ni Senadora Imee Marcos.
Si Senadora Marcos kauban ni VP Sara sa maong pagbisita sa probinsyang Bol-anon.
Giabiabi ni Gobernador Aris Aumentado ang tanang mga bisita gikan sa kauluhan, ug ang tanang gikan sa departamento sa edukasyon, kauban si Bise Gobernador Dionisio Victor Balite Jr., Provincial Administrator Asteria Caberte, ug Education Development Center (EDC) Head Metodio Maraguinot Jr.
Mipadangat usab sa dako nga suporta ngadto sa kalihukan, pinaagi sa ilang presensya, si City Mayor Jane Yap ug kanhi City Mayor Baba Yap. PIMO/ALT
No comments:
Post a Comment