Si Gobernador Aris Aumentado aktibo sa pagpahiluna og mga inisyatibo pagpauswag sa serbisyong panlawas alang sa katawhang Bol-anon.
Kini ang hinungdan nga ang PetroGreen Energy Corporation, usa ka kompanya sa renewal energy diin kasamtangan nga nagpahiluna sa Dagohoy Solar Power Project (DSPP) sa San Vicente, Dagohoy, midonar og usa ka Mobile Medical Clinic ngadto sa Gobernador. Gipahigayon ang turn over niini didto sa tugkaran sa kapitolyo Agosto 29, 2023.
Ang maong behikulo nagkantidad og P1.9 Milyones diin aduna kini tulo ka mga lawak alang sa konsultasyon, eksaminasyon ug laboratoryo aron mapadali ang pagserbisyo ngadto sa mga pasyente.
Aduna usab kini mga kagamitang medikal sama sa nebulizer, BP Aparatus ( steth and aneroid), otoscope, timbangan alang sa mga bag-o pang nahimugso, mga tangke sa oxygen uban sa regulator niini, ug minor surgery kit.
Ang Mobile Surgery Kit nga ubos na karon sa pagdumala sa Governor's Office, pagagamiton sa Medical Outreach Unit ( GO- MOU) sa labing madali nga higayon.
Nagpasalamat si Gobernador Aris sa PetroGreen ning maong kalamboan kay sumala pa sa Gobernador dako kini og tabang nga mapalapdan ang pag-establisar sa Kagamhanang Probinsyal og usa ka himsog nga komunidad, ilabina sa mga lugar nga dili sagad mabisita sa mga nag-una nga ahensya nga nakatutok sa panginahanglan sa komunidad.
Ang mga opisyales sa PetroGreen pinanguluhan sa Presidente nga si Francis G. Delfin mipasalig ngadto sa Gobernador sa ilang pagsuporta sa Kagamhanang Probinsyal pinaagi sa nagkalain-laing mga corporate social responsibility (CSR) nga ilang gikomitar ngadto sa Probinsya.
Ang maong kalihukan gitambungan ni Bise Gobernador Dionisio Victor Balite, Special Assistant to the Governor Emmanuel Caberte, Supervising Administrative Officer (SAO) Metodio Maraguinot Jr., PetroGreen Senior Manager for Business Development Jose Villena Jr., ug PetroGreen Environment and Community Relations Manager Yrel Ventura.
Anaa usab si Mr. Ochi Ryota, ug Mr. Hiwatashi Hiroki, gikan sa Kyuden Internationals, nga mga business partners sa PetroGreen niining Dagohoy Solar Farm.
Kahinumduman nga target sa maong kompanya nga makabaton og 27 megawatts nga enerhiya gikan sa mga solar panels.PIMO/ALT
No comments:
Post a Comment