BOHOL PROVINCE-WIDE HEALTH SYSTEM, DUOL NA ANG KATUMANAN

Sa panagtapok didto sa Bohol Cultural Center, Tagbilaran City, Septyembre 11, 2023; sa mga Local Chief Executives, ug mga kadagkoan sa Provincial Health Office (PHO) kauban si Provincial Administrator Asteria Caberte ug Gobernador Aris Aumentado, nipasubang ang Gobernador nga maoy iyang tinguha nga makabaton og "high-quality life" ang katawhang Bol- anon, pinaagi sa usa ka talagsaong health care system aron pagsiguro sa usa ka healthy Bohol kay kini usa ka hiniusang damgo diin komitado ang mga lokal na opisyales nga kab-uton ang katumanan.

Si Dr. Cesar Tomas Lopez Provincial Health Officer I, nagkanayon nga usa sa lakang nga gitumbok mao ang pagmugna og Inter-LGU Cooperation for Bohol Province-wide Health System alang sa Probinsyang Bol-anon, kay magapalig-on kini sa implementasyon sa Republic Act No. 11223 nga giila isip Universal Health Care Act pinaagi sa pagtinabangay sa mga mayor pagsuporta sa Kagamhanang Probinsyal, mapasayon ang tinguha sa pagsulbad sa problema bahin sa mga health services.

Ang kinatibuk-ang implementasyon sa UHC Act maoy giila nga tubag aron maangkon sa Bohol ang usa ka Primary Care Provider Networks (PCPNs) nga maglambigit ngadto sa secondary ug tertiary care providers, service package sa maong network ug daghan pa nga kaayuhan.

Gikinahanglan usab ang pagmugna sa Provincial Health Board (PHB) pagsiguro sa epektibo nga health services delivery, pagdumala sa Special Health Fund (SHF) ug uban pa, uban ang suporta sa DILG, DOF, DBM, Philhealth ug DOH.

Ang maong PHB pagapanguluhan sa Gobernador uban ang suporta sa mga opisyales diha sa health sector.

Kini ang hinungdan nga gipahigayon ang Memorandum of Agreement (MOA) signing niining adlawa tali sa mga local chief executives sa kalungsuran ug ni Gobernador Aris Aumentado nga nagrepresentar sa Kagamhanang Probinsyal.

Nasayran sa Provincial Information and Media Office (PIMO) nga adunay kwarenta kapin ka mga mayores ang nipirma sa maong MOA.

Gipahigayon usab ang Unveiling Ceremony sa maong MOA Signing, alang sa usa ka "One Unified Healthy Bohol."

Si Gov. Aris mibutyag nga sa tibuok Region VII, ang Bohol, ang unang nakapahigayon og MOA tali sa Kagamhanang Probinsyal ug sa mga Local Chief Executives.

Pagdugang sa Gobernador, sinugdanan pa lang kini sa pinakadako nga engagement ngadto sa Health Care System sa Probinsya.

Sa maong kalihukan anaa usab si Dr. Jaime Bernadas, Dr. Remoses Cabagnot, Hon. Romulo Cepedoza, Hon Dave Duallo, ug Dr. Cesar Tomas Lopez. PIMO/ALT