BOHOL, GIILA SA PRDP VII NGA TOP PERFORMER SA OMAS

Si Gobernador Aris Aumentado, nipadangat sa iyang pagpasalamat sa Regional Operation and Maintenance Audit Team (ROMAT) PRDP VII sa pag-ila niini sa Kagamhanang Probinsyal sa Bohol isip Top Performer sa Rehiyon VII, base sa "Good Rating" nga ilang gihatag sa Provincial Project Management and Implementing Unit (PPMIU) sa PPDO atol sa gipahigayon nga awarding ceremony niadtong Septyembre 8, 2023 didto sa Provincial Capitol, Tagbilaran City.

Kabahin kini sa bag-uhay pa lang nga gipahigayon nga Operation and Maintenance Audit System (OMAS) para sa mga naturn-over na nga mga Farm-to-Market Roads diin nakuha sa mga hingtungdang benepisyaryo nga munisipalidad ug kabarangayan ang taas nga marka atol sa gipahigayon nga monitoring niining mga PRDP projects nga gipondohan sa World Bank gumikan sa maayo nga pag-atiman niini sa mga benepisyaryo.

Si Engr. Ronilita Bunado sa PPDO, diin kansang Head mao si Atty. John Titus Vistal, atol sa interview nagkanayon nga gisubay ang mga proyekto sa PRDP VII ug nakit-an nga maayo kini nga namintinar sa mga benepisyaryo sukad sa implementasyon niini hangtod karon nga tuig 2023 pinaagi sa pakig-alayon sa PPMIU.

Apil sa mga lungod ug kabaranggayan nga gipasidunggan mao ang MLGU Sagbayan ug kabarangayan nga San Agustin, Canmaya Diot, Canmaya Centro, ug Kagawasan, MLGU Catigbian ug kabarangayan sa Baang, Bagtic, ug Mahayag Norte, MLGU Balilihan ug kabarangayan sa Del Carmen Weste, Candasig, ug MLGU Inabanga ug mga kabarangayan ini.

Samtang sa laing bahin, si Renelyn Bayron, Staff sa PRDP kansang Head mao si Engr. Cirilo Namoc, Chief RAED/I BUILD Component RPCO7, sa interview niingon nga ang maong mga proyekto gipondohan sa World Bank og 80% sa contract cost, 10% gikan sa Government of the Philippines ug laing 10% ang counterpart sa Kagamhanang Probinsyal isip equity. Daghan ang nalambigit pagpa-implementinar sa proyekto, hinungdan nga ginasubay nila kini aron masiguro nga tarong kini nga napahimuslan sa mga end-user aron dili mausik ang pondo.

Si Gov. Aris sa iyang pagdawat sa plaque nga GOOD GOVERNANCE PRACTICES nipahayag sa iyang padayon nga kusganong suporta sa DA PRDP Regional Project Coordination VII aron maipadangat ang maayo nga serbisyo ngadto sa katawhang Bol-anon kabahin sa mga imprastraktura.

Ang maong mga pasidungog nga nadawat sa Kagamhanang Probinsyal sa Bohol ubos sa direktiba sa bag-ong Regional Executive Director sa DA Region VII, Angel C. Enriquez, CESO III.

Gilangkob ang maong OMAS sa Rehiyon VII sa mga probinsya sa Bohol, Negros, Siquijor ug Cebu. PIMO/ALT