Si Gobernador Aris Aumentado mipahayag sa iyang kalipay nga ang shooting sa Sweet Escape, dinhe sa Bohol gipahigayon. Matod pa, dako kini nga oportunidad aron mapasundayag ang mga tourist attractions ug ang makasaysayang kultura sa lalawigang Bol-anon.
Tungod niini, full support ang Gobernador ug ang Congresswoman sa Segundo Distrito, Vanvan Aumentado, sa maong film.
Sa Dalareich Chocolate House gipahigayon ang unang shooting sa Sweet Escape. Adunay "special participation" niini ang magtiayong Aumentado kauban ni Matet De Leon ug William Lorenzo, ug Ayesha Cervantes isip timaan sa ilang pagsuporta.
Ang Sweet Escape usa ka Independent film sa RR Entertainment Productions, ubos sa direksyon ni Rommel Ricafort nga si Shine Ricafort ra usab ang producer.
Ang sugilanon sa maong film, mutuyok diha sa usa ka lokal nga negosyo, ang Dalareich Chocolate House nga ang produkto gikan sa Cacao.
Si Ms. Dalareich Polot, usa sa mga tag-iya sa Chocolate House, aktibo nga volunteer sa mga nagkalain-laing inisyatibo pag-empower sa mga kababayen-an diha sa pagnegosyo ug pagpanguma. Makugihon kini nga nagkumbinsi sa mga Bol-anon pagpananom og mga Cacao og kape.
Tungod sa iyang talagsaon nga adbokasiya ug talento, nakuha si Ms. Polot nga skolar sa Goldman Sachs.
Si Ms. Polot ang pinakauna nga Filipina nga nakadawat og Fortune Global Women Award tuig 2022 didto sa California.
Samtang sa laing bahin ang maong Indie Film, naghatag og extra income sa mga mahiligon sa acting, diin kasagaran sa cast, talent, crew ug uban pang kinahanglan sa set, dinhe ra gikuha sa probinsya.
Bida usab sa pelikula si Ms. Arci Muñoz ug ang Korean Actor nga si Kang Dong Gyun.
No comments:
Post a Comment