KAPIN SA 4 MILYONES NGA LIVELIHOOD GRANTS NADAWAT SA MGA PEOPLE'S ASSOCIATIONS SA BOHOL

Mapasalamaton ang pito ka mga People's Associations sa ilang pagdawat og tseke gikan sa buhatan sa Department of Labor and Employment (DOLE) atol sa turn over nga gipahigayon didto sa Ceremonial Hall, New Capitol, Tagbilaran City adlawng Lunes Abril 17.

Gitunol ni Gobernador Aris Aumentado, Labor and Employment (LEO) Chief Maria Eloida Cantona, representante ni Congresswoman Vanvan, Edgar Del Rosario, ug mga kaubanan ang Livelihood Grant alang sa pito ka mga asosasyon nga mao ang Samilca Irrigators Association Inc., Dagohoy kantidad P840,000.00, Smile San Vicente Farmers Association (SSAVFA), Ubay kantidad P998,248.00, Bato Women's Association(BAWA), Buenavista sa kantidad P499,782.00, ang Camarin Farmers' Association(CAFA),Danao kantidad P475,076.00, ang United PROHANCE Irrigators Association sa Pilar ug La Haciendap-Katipunan Farmers Association Inc. sa Alicia kantidad P1,499,930.00 ug ang Alburquerque Tricycle Drivers Association (ATDA) Albur kantidad P499,978.00.

Mikabat sa P4,813,014.00 ang nahatag sa panudlanang Nasyonal ngadto sa pito ka asosasyon, diin obligado ang matag asosasyon pagtugbang niini isip equity. Mikabat ang equity sa mga asosasyon ngadto sa P1,647,818.00.

Si Gobernador Aris Aumentado mipahimangno sa mga benepisyaryo nga ampingan ug palambuon ang mga nadawat nga grant aron ang maong mga asosasyon makatabang usab sa uban nga anaa sa ubos nga hut-ong sa katilingban. Si Aumentado mipasidaan ngadto kanila nga dili pasipad-an ang kwarta sa gobyerno kay bisan ang dagko nga mga politiko mapriso gumikan sa hiwi nga paggamit sa pondo, busa ang mga asosasyon usab adunay kaakuhan nga matinud-anong gamiton ang hinabang sa gobyerno. Ang gobernador mipasalamat sa mga representante sa tulo ka distrito nga maoy tigpahiluna sa mga budget aron mudangat ngadto sa DOLE. Mipahalipay usab si Gov. Aris sa tanang mga benepisyaryo uban ang panghinaot nga magkita sila pagbalik, kay andam ang gobernador murekomendar og dugang pondo alang kanila kung magmalampuson ang ilang proyekto.

Si Congresswoman Vanvan Aumentado nga maoy naningamot alang sa Segundo Distrito girepresentahan ni Edgar Del Rosario mipadala sa iyang mensahe pagpahalipay sa mga asosasyon ug pagdasig kanila nga kab-uton ang ilang mga damgo sa pag-uswag.

Ang Chief LEO nga mao usab ang DOLE Provincial Director nagkanayon nga ang DOLE adunay tulo ka programa pagtabang nga mao ang "transformation, enhancement, ug restoration." Adunay accountability ang mga benepisyaryo pagsubmitar sa ensakto nga liquidation human magasto ang maong assistance.

Samtang sa laing bahin si Mrs. Estrellita Verenio mipasabot sa mga angay ug dili angay buhaton aron makab-ot ang kalampusan sa ilang mga business plans ug kung unsa ang nakalatid niini nga gamitan sa pondo mao lamang ang sundon.

Mipahayag si Antonio Labonug, presidente sa ATDA mihatag pagpasalamat sa tanang gihimong instrumento aron sila matabangan ug ang ubang mga kapunungan. Pagdugang niini, ang iyang pagkabaldado tungod sa iyang sakit dili makapugong sa iyang determinasyon pagtabang sa ilang kapunungan sa mga drivers.

drivers.