VICE GOV. EJ FALCON, OWWA ADMIN ARNELL IGNACIO, SEN. BATO MIBISITA SA BOHOL

Ang League of Vice Governors of the Philippines (LVGP) nagpahigayon sa usa ka 3-day activity, sa probinsya sa Bohol, ang ilang National 92nd Assembly diin gisugdan nila kini sa usa ka pormal nga programa didto sa Bellevue Resort, Panglao Island, Bohol, Marso 2 hangtod Marso 4.

Apil nga mitambong sa kalihukan mao ang popular nga showbiz personality turned politician nga si Vice Governor Ej Falcon, ang Overseas Workers Welfare Administration (OWWA) Administrator, nga si Arnaldo A. Ignacio ug ang bisaya nga senador ,Sen. Ronald “Bato” Dela Rosa.

Importante nga kalihukan sa maong asembleya mao ang pagsaksi sa 39 ka mga bise gobernador sa paglagda ni Hon. Katherine C. Agapay LVGP National President, Bise Gobernador sa Laguna ug OWWA Admin. Arnell Ignacio sa usa ka Memorandum of Agreement tali sa mga bise gobernador ug sa Overseas Workers Welfare Administration(OWWA), bahin sa pag-institutionalize sa namugna nga Provincial Migrant Workers Help Desk nga ipatuman sa matag lalawigan sa tibuok nasod, aron matutukan ang mga panginahanglan sa mga Overseas Filipino Workers(OFW).

Ang maong inabrihang programa gipanguluhan sa bise gobernador gikan sa Aklan, Atty. Reynaldo M. Quimpo, isip Chairman sa Board, Hon.Christine S. Garin sa Iloilo nga Vice President for the Visayas, ug Atty. Katherine C. Agapay gikan sa Laguna.

Ang delegasyon giabi-abi ni Hon. Dioniso Victor Balite ang bise gobernador ug sa pagkakaron Acting Governor sa Bohol.

Gipasabot ni Ignacio ang dugokan sa MOA ug gihangyo ang bug-os nga suporta sa mga bise gobernador pagmugna og mga balaodnorn pagproteher sa mga OFWs. Ang maong mga mamugna nga balaodnon, igapatuman sa mga Local Government Units aron mapukaw ang aktibo nga partisipasyon sa kalungsuran ug kabarangayan sa mga programa sa OWWA.

Si Hon. Gerald “Dindi” Tan nga Executive Director sa National Integration Center for OFWs namahayag bahin sa Gender Equality and Sensitivity on Gender Governance. Samtang ang OWWA Regional Director sa Region VII nga si Martel R. Dasayon mipasabot nga kalab-uton sa ahensya ang pagbutang og mga help Desk sa matag lungsod ug ang pag-agni sa aktibo nga partisipasyon sa mga kabarangayan niining maong help desk aron mapasayon ang paghatod sa mga benepisyo ug tabang ngadto sa mga OFW ug sa ilang mga pamilya sama sa scholarship grants, financial assistance ug uban pa.

Ang ikaduhang adlaw sa panagtapok sa mga bise gobernador, nagmabungahon gumikan sa ilang Countryside Bohol Visit diin ilang gisuroy ang nag-unang mga tourist attractions sa probinsya sama sa Sandugo/ Blood Compact Shrine sa Tagbilaran, Manmade Forest sa Bilar, Chocolate Hills sa Carmen, Mirror of the World sa Sikatuna ug uban pa. Gisuportahan sa maong mga bise gobernador ang turismo sa probinsya.

Si Sen. Bato misuroy ngadto sa nagkalain-laing munisipalidad sa aron pagpangumusta ug pagpahibalo sa mga mayores sa mga updates gikan sa Senado.

Sa ngalan sa Gobernador Aris Aumentado, mainitong giabi-abi ni Provincial Administrator Asteria Caberte si Sen. Bato, si Vice Gov. Ej Falcon ug ang tanang bise gobernador didto sa kapitolyo.

Ang Gobernador, mipaabot sa iyang pagtimbaya sa mga membro sa LVGP, kang Sen. Bato ug Admin Arnel Ignacio. Si Gobernador Aris anaa sa pareho kaimportante nga kalihukan sa pagkakaron didto sa Israel.