Adunay nadawat nga mensahe ang buhatan sa gobernador gikan sa Ambassador sa Israel, nga nag-imbita kang Gobernador Aris Aumentado pag-apil sa delegasyon paingun sa Israel aron muobserbar sa mga best practices sa maong nasod bahin sa paglambo sa ilang ekonomiya sa natad sa agrikultura, panlawas, pagdumala og airport, cybersecurity, teknolohiya ug uban pa.
Matod pa sa maong mensahe nga oportunidad kini aron personal nga masinati ang mga bag-ong teknolohiya sa Israel atol sa ipahigayon nga “showcase”.
Nianang higayona, anaa usab ang mga potential investors gikan sa ubang mga nasod nga posibleng magka interes nga mamuhunan sa Bohol Province.
Isip usa ka Gobernador ug Chairman sa Regional Development Council (RDC) sa Region VII, dili angay sayloan ang ingun ani nga mga pribilehiyo, ilabina nga dili masakripisyo ang panudlanan sa gobyerno sa maong byahe. Matod pa nga dili gikan sa Panudlanang Probinsyal ang mga gasto sa maong byahe, sa gobernador.
Higayon na kini aron makakuha og mga stratehiya gikan sa Israel ilabina nga nabantog kini nga usa, sa napulo ka mga inila nga gamhanang nasod sa tibuok kalibutan ug ikaupat sa pinaka establisado nga pwersang militar. Ang ilang mga best practices bahin sa pagmugna ug mga teknolohiya makatabang pagpalambo sa probinsya sa aspeto sa panlawas, agrikultura, pagdumala sa tinubdan sa atong tubig ug uban pa. Si Isaac Herzog mao ang Presidente sa Israel ug si Benjamin Netanyahu mao ang Prime Minister.
Ang Israel napahimutang isip usa ka nasod niadto lang Mayo 14, 1948, ug adunay populasyon nga 9.364 million lamang sa tuig 2021 apan progresibo na kini karon ug lig-on ang ekonomiya. Bisan ang ilang Ben Gurion International Airport sa Tel Aviv adunay talagsaon nga comprehensive security system. Kini ug daghan pa mao ang mga rason sa byaheng Israel aron matun-an kung unsaon nga makakuha og mga ideya nga pwedeng makopya sa probinsya.
Mahinumduman nga daghang mga nasod ang interesado pagbaton sa alyansa ngadto sa Bohol pinaagi sa sisterhood agreement ug kini oportunidad sa mas dugang job opportunities ug mga hinabang, apil na niini ang mga foreign investments.
Sulod sa walo ka buwan sa Abante Administration, daghan nga nasod ang mipahigayon og pagbisita sa gobernador. Apil na niini ang British Ambasador H.E. Laure Beaufils, Bangladesh Europian Ambasador H.E. F.M. Borhan Uddin, South Korea, Czech Republic, Ambassador Huang Xilian sa China ug aduna pa’y daghan nga umaabot.
Ang nasod sa China midonar ngadto sa Kagamhanang Probinsyal kantidad 15M alang sa pagbuhat og fishing village pagpalig-on sa industriya sa pangisdaan. Kalab-uton nga ang Bohol mahimong usa ka pilot province pagmugna og mga fishing villages tali sa China ug Pilipinas.
Ang CeBoley ug China Harbor Engineering Corp. interesado usab pagbuhat sa Bohol-Cebu Bridge.
Sa dihang giimbitahan ang gobernador pag-adto sa Kuala Lumpur Malaysia, gitutukan niini ang pagsubay ang MEC Clearwaste Nature Restoring Facility nga buot dalhon sa usa ka investor ngadto sa Bohol kay dako kini og ikatabang pagsulbad sa problema sa basura ilabina ang mga hospital wastes.
Niining maong byahe pa-Israel, tumong sa gobernador nga , makatabang kini sa atong probinsiya pagmugna og mas daghang job opportunities alang sa mga kaigsoonang nagkinahanglan og trabaho. Pangindahay sa gobernador nga mabati sa masa ang bunga sa mga paningkamot sa kagamhanang probinsyal.
Si Gobernador Aris kinasingkasing nga nag-awhag sa iyang mga kadugong Bol-anon nga magbaton sa positibo nga mga panlantaw ug makighiusa uban kaniya pagpaabot sa mga serbisyo ngadto sa katawhang Bol-anon. Siya nagkanayon nga wala siya’y mahimo nga bisan unsang kaayuhan para sa mga Bol-anon sa iya lamang kaugalingon, kay siya isip gobernador, instrumento lamang sa mga kaayuhan nga gikan sa Labawng Makagagahom.
Kung magtinabangay ang katawhang Bol-anon sayon atubangon bisan ang pinakamalisod nga sitwasyon .
No comments:
Post a Comment