Gatusan ka mga residente sa Lungsod sa Getafe ang nakabenepisyo sa gipahigayon nga Abante Barangay Service Caravan, didto sa Barangay Campao Oriental, Getafe adlawng Byernes Pebrero 24, 2023.
Tingpahuway unta kining adlawa sa mga empleyado gumikan sa gipakanaog nga Proclaimation No.167 ni Presidente Bongbong Marcos nga nagdeklarar sa Pebrero 24 isip Special Non-Working Holiday apan ang kugihan nga gobernador, dinuyugan sa mga empleyado, andam, ug nagkahugpong pagpahigayon sa caravan aron ihatod ngadto sa nahisgutang barangay, ang nagkadaiyang serbisyo sa Abante Administration.
Sa kagamhanang Probinsyal, aktibo ang GO-Medical Outreach Unit (MOU), pagpanghatag og tambal sa tanang nagpakonsulta bahin sa ilang balatian.
Samtang 5 ka doktor sa Provincial Health Office (PHO) ang nagtambayayong paghatag sa serbisyong panlawas nga mao sila si Dr. Emerson Mateo-PHO, DR. Estrella Lim-G.O/Redcross, Dr. Mike Jayoma-GMPH, Dr. Dulce Budiongan-Inabanga Hospital, ug Dr. Pamela Marie Chua-DOH/DTTB, Getafe.
Sa maong serbisyo publiko 347 ang nakabenepisyo sa serbisyong medical, diin 17 niini nagpatuli, 289 ang nagpakonsulta ug nangayo og tambal 41 ang nagpaibot sa ilang ngipon.
All out usab ang suporta sa ubang ahensya sama sa BEPO-PESO ang ahensya nga nagtutok pagtubag sa mga isyo bahin sa kapamilyang OFW o sa nagkinahanglan og trabaho. Ang Office of the Provincial Veterinarian (OPV)sa ilang mga vitamins ug purga sa kahayupan, PYDO/EDC alang sa pangutana bahin sa college scholarships, Local Government Affairs(LGA), Office of the Provincial Social Welfare and Development(OPSWD)para sa mga foodpacks ug school supplies, Office of the Provincial Agriculture(OPA)sa mga seedlings ug seeds, Provincial Legal Officer(PLO) sa mga legal consultations ug Provincial Cooperative Development Authority(PCDO).
Sa adunay problema sa yuta anaa ang Registry of Deeds-Bohol nga makatubag sa mga pangutana.
Alerto usab pagmintinar sa kahapsay ug kalinaw ang 47th IB sa Philippine Army, ug ang PNP Getafe nga mitanyag usab sa libreng gupit.
Samtang sa laing bahin, personal nga gitunol sa gobernador ang tseke ngadto sa Barangay Jandayan, Getafe nga nagkantidad og kapin sa PhP40 mil sa proyektong pagtaod og fiber glass sa basketball court ug laing tseke alang sa LGU Danao ubos sa liderato ni Mayor Jose Cepedoza sa kantidad usa ka milyon ka pesos kapin, alang sa pagpaayo sa RHU building.
Pipila ka mga residente usab sa barangay Corte-Baud, Getafe, nakadawat sa mga foodpacks gikan sa OPSWD.
Sa tema nga "Gikan sa kapitolyo, alang sa Boholano, ang gobernador matinud-anong nagdasig sa pagtinabangay aron mabati sa mga Bol-anon ang suporta gikan sa kagamhanang probinsyal. Mipasalamat si Gov. Aris kang mayor Camacho ug sa mga opisyales sa lungsod, sa barangay, sa tibuok LGU Getafe ug sa tanang nahimong kabahin sa maong Abante Barangay Service Caravan.
No comments:
Post a Comment