PGBH D-LEAGUE GOVERNOR’S CUP

Good news para sa mga kabatan-onan nga mahiligon sa sports, kay ang gobernador nagatan-aw nga maumol ang mga skills ug talent sa mga basketball enthusiasts.

Ang Kagamhanang Probinsyal magapasiugda sa PGBh Developmental League, Juniors and Open Division nga pagasalmutan sa tulo ka distrito, 1st, 2nd ug 3rd district.

Gihatagan sa tahas ang Provincial Youth Development Office(PYDO) inabagan sa Local Government Affairs(LGA), sa pagpahigayon sa maong liga.

Subay niini gitigom ang tanang mga coordinators sa nagkalain-laing lungsod aron ipahibalo ug ipasabot ang bahin sa Governor’s Cup.

Ang maong basketball games adunay duha ka division diin ang pwedeng muapil sa Juniors magapangidaron og 16-20, samtang ang Open Division walay age requirement apan gikinahanglan nga enrolled sa bisan asa nga pribado o publiko nga eskwelahan. Para sa mga desidido, muapil sa team sa LGU ug isubmitar ang kopya sa PSA birth certificate kung sa Juniors Division, ug parents’ consent kung minor aged, voters certification, vaccination card/certificate ug waiver. Ang pagsubmitar sa maong mga dokomento didto sa PYDO, taman lamang sa Marso 20, alas 5:00 sa hapon.

Ang PGBH D-League Governor’s Cup adunay giandam nga mga awards sama sa Most Valuable Player(MVP), Mythical Five, Sportsmanship Awards ug uban pa. Gipreparahan ang mga cash prizes niini, ug ang mga mayo nga mudula, adunay posibilidad nga makaduwa sa dinagko nga Tournament.

Tumong niining maong liga nga mabansay ang mga kabatan-onan nga nakakitaan ug skill sa basketball aron makabaton sa oportunidad nga malibre sa pag-eskwela pinaagi sa scholarships. Ginaawhag usab pinaagi niini, ang mga out-of-school youths nga mupadayon sa pag-eskwela.

Kining maong Bohol Inter Town Tournament mulungtad gikan sa Abril 9, 2023 hangtod Oktubre 28 sa mao gihapon nga tuig. Ang opening niini ngadto sa Tersero Distrito didto sa Candijay ipahimutang Abril 9. Sa Segundo Distrito adto sa Talibon karong Abril 16, ug sa Primero Distrito, Abril 21 diin ipahigayon kini sa lungsod sa Calape.

Ang Kagamhanang Probinsyal nagdasig sa tanang mga mahiligon sa basketball, pagsuporta nining gitawag nga mother of all leagues.