ASEAN WORKING GROUP ON INTELLECTUAL PROPERTY COOPERATION (AWGIPC) SA BOHOL GIPAHIGAYON

Mapasalamaton ang Kagamhanang Probinsyal ngadto sa Intellectual Property of the Philippines(IPOPHL), sa desisyon niini nga sa Bohol ipahigayon ang ika-69 nga meeting sa ASEAN Working Group on Intellectual Property Cooperation (AWGIPC).

Ang 69th AWGIPC Meeting gilangkob sa mga ASEAN Member States ug sa mga ASEAN dialogue ug development partners. Niining maong tuig ang nasod sa Pilipinas mao ang chair sa maong AWGIPC ug ang meeting gipahigayon sa Panglao island.

Marso 12, nagsugod og pangabot ang mga delegado nga gikan sa nasod sa Cambodia. Gipangunahan ni IPOPHL Director General Rowel S. Barba ang unang batch sa delegasyon. Personal sila nga gitagbo ni Panglao Mayor Edgardo Arcay ug Vice Mayor Noel Hormachuelos didto sa Bohol-Panglao International Airport(BPIA). Gilauman nga adunay ipahigayon nga roadshows sa Tagbilaran, Dauis ug Panglao.

Tuod man nagpahigayon ang IPOPHL og duha ka adlaw nga Intellectual Property (IP) Roadshow didto sa Bohol Cultural Center Marso 13-14, aron mapalapdan ang kahibalo sa mga Micro Small Medium Enterprise (MSME), artists ug uban pang individuals bahin sa IP ug ang ilang katungod sa ilang mga mugna. Makatabang kini nga ang industriya sa turismo masinangkapan alang sa global competitiveness. Ang Intellectual Property naglangkob sa patents, utility models, copyrights, industrial designs, trademarks, plant variety protection, integrated circuit designs, genetic resources, trade secret, traditional knowledge, geographic indications ug domain names.

Si Gobernador Aris Aumentado, mainiton nga miabi-abi kang DG Barba, ug sa DTI Region VII Director Maria Elena Arbon. Ang gobernador miawhag sa tanang mga mitambong pagpahimulos sa higayon nga masabtan kung unsa ang ilang mabenepisyo sa mga programa ug mga serbisyo sa IPOPHL.

Ang tibuok nga pwersa sa IPOPHL nakatutok sa pagpasabot ngadto sa mga attendees sa dili muminus unom ka topiko bahin sa IPOPHL ug bahin sa IPR. Si DG Barba mipahayag sa iyang pag-ila sa Bol-anong Asin Tibuok nga matod pa talagsaong asin sa tibuok kalibutan, samtang ang Ube Kinampay gitawag sa Bureau of Plant Industry nga Queen of all Yams. Pagdugang ni Barba, ang mga nahisgutan, geographical indicators(GI) sa mga Bol-anon.

Samtang sa laing bahin, gilusad usab ang IPOPHL Helpdesk sa DTI Bohol ug ang GI capacity building alang sa Ube Kinampay Producers.

Presente usab sa maong kalihukan ang Provincial Administrator Asteria Caberte, DTI Provincial Director Marisol Balistoy, Board Member Lucille Lagunay, ang mga abogado gikan sa IPOPHL nga facilitators sa maong kalihukan ug ang mga staff sa DTI-Bohol.

Mipatighulog ang grupo ngadto sa Ceremonial Hall, New Capitol alang sa KaIPhan, sa Press Conference kauban ang local media. Ang Provincial Information and Media Office (PIMO), mipahigayon ug livestreaming sa maong kukabildo kauban si DG Barba, RD Arbon ug Gov. Aris. Gihisgutan ang mga isyu nga may kalabutan sa IPR.

Suma tota, ang IPOPHL nakatabang aron mapalig-on ang mga Negosyo sa mga Bol-anon, mapauswag ang ilang kahibalo pagpanalipod aron dili mahilabtan sa lain ang ilang mga mugna ug masayran ang mga serbisyo ug programa nga gitanyag sa buhatan sa IPOPHL.