MV FILIPINAS UBAY, MAIDEN VOYAGE SA MARSO 12

Miduyog ang kahigayonan diha sa Strategic Roadmap Governance sa Kagamhanang Probinsyal diin ang “mission” niini nagatumbok pagpauswag sa ekonomikanhong kahinguhaan pinaagi sa epektibong partnership tali sa mga stakeholders aron makab-ot ang global competitiveness.

Marso 11, 2023, malampuson nga gi-inagurahan ang MV Filipinas Ubay, didto sa Ubay Port, Ubay, Bohol. Matud pa, nga mao kini ang ika-15 nga Roll On Roll Off( RoRo) nga barko sa Cokaliong Shipping Lines Inc. Gituohan nga mao kini ang unang barko sa Cokaliong nga giinagurahan gawas sa Sugbo. Sa maong inagurasyon, personal nga mitambong ang magtiayong Chester ug Anna Lynne uban sa ilang anak nga si Chanel, ang mga tag-iya sa Cokaliong Shipping Lines Inc.

Gipahigayon ang maong inagurasyon uban ni Gobernador Aris Aumentado, Congresswoman Vanvan, Bise Gobernador Dionisio Victor Balite, Mayor Constantino Reyes, Vice Mayor Victor Bonghanoy, Councilor Violita Reyes ug mga SB officials, PPA Officer Necilyn Bongosia, mga brgy. officials ug ubang dinapit.

Marso 12, ang maiden voyage niini, diin mubyahe gikan sa Ubay ngadto sa Cebu, matag adlaw, alas 8 sa buntag ug gibanabana muabot sa Cebu alas dose sa udto. Mubalik usab kini sa Bohol, via Ubay alas 8 sa gabii ug muabot sa alas dose sa tungang gabii.

Naghatag kini og kagaan sa mga Bol-anon nga muadto sa Sugbo apan medyo distansya sa Tagbilaran City o sa Tubigon. Ang ticket niini kantidad lamang og P400.00 para sa economy ug P440.00 para sa tourist.

Sumala sa kanunay nga pagpangumbinsir ni Gobernador Aris Aumentado sa mga potential investors, si Mr. Chester Cokaliong, mibuhi sa kantidad P110 Million alang niining maong vessel. Ang gobernador nag-awhag sa mga Bol-anon nga suportahan kining MV Filipinas aron nga magpermanente na kini sa maong rota.

Si Congresswoman Vanvan Aumentado sa Segundo Distrito, nagkanayon nga kining maong oportunidad, panahon sa dugang paglambo sa Ubay. Ang maong barko makapasakay og 356 ka mga pasahero. Makapakarga kini ug 15 ngadto sa 20 ka mga sakyanan nga adunay mga kargamento.

Matod sa gobernador nga ang Kagamhanang Probinsyal padayon sa pag-agni og mga investors pagsulod sa Bohol aron mudaghan ang job opportunities ug makunhuran ang numero sa mga wala pa’y trabaho.