Marso 9, nahitabo ang “cassava tragedy”, sa lungsod sa Mabini, 18 na ka tuig ang milabay. Mikalas kini og daghan nga kinabuhi sa mga kabataan nga nagtungha sa San Jose Elementary School gumikan sa dili tinuyo nga hitabo. Dinhe sa susamang petsa buot sa pangagamhanan nga ipaabot ang mensahe sa kalambuan, mas mabungahon ug mas maigmat nga lakaw sa panginabuhi aron dili na masubli ang maong panghitabo.
Ang Kagamhanang Probinsyal, pinanguluhan ni Gobernador Aris Aumentado nagpahigayon og usa ka Abante Barangay Service Caravan didto sa San Jose Covered Court, diin apil nga benepisyaryo niini dili lang ang mga residente sa San Jose kundili apil usab ang barangay Del Mar ug barangay Paraiso.
Gihimo ang ceremonial turn-over sa tanang gipanghatag ngadto sa katawhan niining adlawa. Kauban sa gobernador si Mayora Ongie Grace Lim sa maong turn over. Gitunol usab ni Gov. Aris ang tseke ngadto ni Mayora kantidad P5 milyon alang sa pagpatrabaho sa ilang gymnasium. Hilabihan ang kalipay ni Mayor Ongie Grace Lim ug sa katawhan sa maong tabang nga mapaayo ang ilang tapukanan.
Adunay mga school supplies gikan sa Education Center nga gipanghatag ngadto sa mga kabataan. Ang Office of the Provincial Veterinarian(OPV) nagpahigayon usab og milk feeding sa maong mga bata. Gikan kini sa gatas sa kabaw nga produkto sa Dairy Farm sa probinsya.
Ang Governors Office-Medical Outreach Unit (GO-MOU) ug ang Provincial Health Office(PHO) mitanyag sa libreng tuli ngadto sa mga kabataan, libreng ibot sa ngipon ug pagpakonsulta. Ang mga hamtong nakabenepisyo usab sa medical ug dental services. Adunay gipanghatag nga tambal ug vitamins alang sa nagkinahanglan. Adunay mga doctor, nurse ug pharmacist ug kinyentos ka mga lumulupyo sa Mabini ang direkta nga naserbisyuhan sa medical mission.
Si Romeo Teruel, nangulo sa libreng patupi ngadto sa mga kabataan, ug mga hamtong uban sa mga Bohol Task Group sa 47th IB. Si Teruel mao ang focal person sa End to Local Communist Armed Conflict(ELCAC).
Ang Office of the Provincial Social Welfare Development (OPSWD) pinaagi sa ilang head Mita Tecson, nanguna sa pagpanghatag sa mga foodpacks (bugas ug delata) ngadto sa mga residente sa brgy. San Jose diin dul-an sa usa ka libo ang nakadawat sa maong mga tabang gikan sa Kagamhanang Probinsyal.
Tibuok pwersa sa kapitolyo ang misuporta sa gobernador sa maong caravan. Anaa ang Provincial Legal Office(PLO) alang sa mga legal services, BEPO-PESO alang sa mga nagkinahanglan ug tubag sa pangutana bahin sa trabaho, Provincial Treasury Office (PTO) nga maoy nagbitbit sa mga tseke, hinabang sa mga recipients, PGSO, PCDO, ilabi na gayod ang Local Government Affairs (LGA).
Anaa usab ang MARINA alang sa mga serbisyong may kalabutan sa kadagatan ug ang Registry of Deeds (ROD) nga nagpanghatag sa mga titulo nga bag-ong nahuman pagproseso sa buhatan.
Gibana-bana nga dul-an sa lima ka libo ang katawhan nga misaksi sa maong Abante Barangay Service Caravan.
Dili lang barangay San Jose, Del Mar ug Paraiso ang gihatdan sa gobernador sa tinud-anay nga serbisyo, gumikan human sa caravan, milahos kini ngadto sa barangay Minol aron pagsubay sa road concreting nga iyang nasugdan didto dapita ug iya usab gihatod ang tseke ngadto sa mga opisyales kantidad P200,000.00 para sa dugang road concreting ug aduna pa’y idugang matod pa aron mahuman ang maong kalsada.
Miadto usab kini sa brgy. Valaga ug laing P200,000.00 ang iya usab gihatod alang sa ilang Brgy. Perimeter Fence.
Gisubay usab sa gobernador ang 7.5 milyon road concreting sa barangay Cawayanan nga iyang proyekto samtang gitunol ni Gov. Aris ngadto sa mga opisyales ang Provincial Aid nga P82,000.00 para sa ilang inter town basketball ug inter brgy. volleyball.
Ang Poblacion Dos, wala magpaulahi kay 500,000.00 ang gihatod ni Gov. Aris ngadto kanila alang sa ilang two-storey multi purpose bldg.
Kauban sa gobernador sa check distribution si mayor Ongie Grace Lim, bise mayor Myra Coles, Board Member Nathaniel Binlod, BM Elpedio Bonita ug kanhi mayor Stephen Rances.
Bisan sa kadaghan nga accomplishment sa gobernador niining adlawa apan alerto usab kini nga miresponde ngadto sa Hanopol, Balilihan sa dihang adunay engkwentro nga nahitabo tali sa mga walhong grupo ug sa mga AFP sa dihang paingun pauli ang team ni Gov. Aris. Inubanan sa OPSWD ug LGU Balilihan, gihatagan usab kini sa gobernador og mga foodpacks ang mga residente nga wala una papaulia sa ilang panimalay nianang gabhiona ug gipabakwet sa makadiyot sa ilang brgy. pagsiguro sa ilang kaluwasan.
Matod sa gobernador nga ang iyang administrasyon, tinud-anay ang pag-alagad aron mabati sa katawhan ang mga serbisyo sa Kagamhanang Probinsyal. Giawhag sa gobernador ang pagtinabangay aron makab-ot ang kalampusan sa gitinguha nga kauswagan.
No comments:
Post a Comment