MOTOR7 CENTRAL VISAYAS SA BOHOL LOOP 2023

Ang Motor7 Central Visayas Adventures sa Department of Tourism Central Visayas Office kasamtangan nga nagpasiugda sa Bohol Loop 2023, uban sa pagtambayayong sa Land Transportation Office(LTO) Region 7, producer-director nga si David Tuting, ambasadres sa Tourism Promotions Board Philippines, Philippine Motorcycle Tourism, ang popular nga si Jet Lee, Trunx Adarna Q815 ug uban pa.

Nailhan ang Bohol Loop 2023, nga usa ka kalihukan diin ang mga riders gikan sa nagkadaiyang lugar sa nasod, musuroy sa nagkalain-laing mga tourist destinations lalawigang Bol-anon. Gikataho nga adunay dili muminus sa 1,364 nga mga riders ang nagparehistro alang niining maong event. Mudangat ngadto sa 600 ka kilometro ang ilang daganon gikan sa Old Airport ngadto sa dose ka mga destinasyon.

Mahinumduman nga nangabot ang maong mga riders didto sa old airport buntag sa Marso 17. Ang tibuok nga adlaw gigahin alang sa preparations, registration ug sa media interaction.

Gipahigayon sa Provincial Government pinaagi sa Provincial Information and Media Office (PIMO) ang live Press Conference alang sa Bohol Loop 2023 pinaagi sa host nga si Mr. Raul Gatal diin ang mga speakers mao sila si Ms. Gee De Asis sa DOT R7, David Tuting, ug si Ms. Jo Cabarrus sa Bohol Provincial Tourism Office. Gipasabot sa mga speakers kung unsay katuyuan sa maong Mototourism.

Matod pa, nga ang maong Mototourism usa ka kalihukan pagpasundayag sa kaanyag sa gitawag nga “God’s little Paradise”. Adunay mga prominente nga mga rider-vloggers nga mag-sight seeing ug mu-feature sa mga talagsaong talan-awon sa Bohol. Ginaduso ang mainampingon nga pag-padagan pinasikad sa Presidential Decree No. 96, “penalizes the unlawful use of sirens, blinkers, domelights and other similar emergency devices which may be used only by ambulances, policemen, firemen, personnel of the LTFRB ug NBI”ug RA 4136 “it shall be unlawful for any person to operate any motor vehicle without having in his possession a valid license to drive a motor vehicle “ug pag-obserbar sa sakto nga speed limit.

Sumala pa ni Cabarrus nga napahibalo na ang mga maagian nga Local Government Units sa pagpangandam ug paghiklin sa mga posibleng mga babag sa agianan, ilabina ang mga layaw nga iro diha sa kadalanan. Nakaalerto usab ang ilang mga Municipal Disaster Risk Reduction Management Office sa mga posibleng kakulian ug ang kapin kun kulang usa ka gatus ka mga personnel nga magbantay alang sa seguridad. Anaa usab ang Kagamhanang Probinsyal sa pagsuporta.

Alas kwatro sa kabuntagon Marso 18, nagsugod ang maong endurance gikan sa Old Airport ug ang una nila nga agiang check point diin didto sila magselfie ug mag-scan sa ilang QR Code aron pagmatuod nga nahiabot na sila nianang maong dapit , mao ang Anda. Human niana mao ang Getafe Municipal Hall, Chocolate Hills Complex/viewpoint, Tarsier Conservation Area, Baclayon Church, Alona Beach, St. Augustin Parish Church, Panglao, Loon Municipal Hall, Trinidad Municipal Hall, Bilar Man-Made Forest, Sikatuna Mirror of the World, ug ang Tagbilaran City Finish Grid.

Ang maong Loop dili usa ka lumba, gikinahanglan lang mahuman ang 600 km drive sulod sa 48 hours gikan sa alas 4 sa buntag Marso 18. Aduna kini photography contest ug pa-raffle. Sa P2,500.00 nila nga registration, makasalmot sa raffle draw alang sa usa ka Brand New 2023 Kawasaki KLX 150 latest model trail/dirt/ offroad bike. Aduna kini Bohol Loop shirt, vest, balaclava, riders id, sticker ug Castrol Motorcycle engine oil. Ang makatiwas niini pagahatagan sa Finisher Longsleeves, sticker,certificate ug medal.

Ang maong mga finisher freebies igahatag alas dyes sa buntag adlawng Domingo ug paghimoon ang closing program isip pagtak-op sa maong event.

Ang Gobernador nauna nang, miawhag sa nagkalain-laing sector ug mga turista sa pag bisita sa lalawigang Bol-anon. Kini usa ka oportunidad sa turismo sa probinsya.

Pinaagi sa facebook post, mainitong gi-welcome sa gobernador ang mga loopers ug gipahinumdum ang safe driving.

Dili malikayan nga adunay mga kakulian panahon sa event. Isolated cases lang kini kumpara sa kalipay sa tanang mga midayo aron pagsuportar sa turismong Bol-anon.

Giawhag ang mga Bol-anon nga magbaton og positibo nga panglantaw ug suportahan ang kalihukan. Isip kulturang Bol-anon, ipakita ang hiyas sa pagkamaabi-abihon aron kini maoy balon sa mga turista nga handumanan sa ilang pagpauli sa tagsa-tagsa nila ka mga dapit.