ASF ENTRY SA CEBU, BOHOL NAALARMA, GIPANGUSGAN ANG PAGPANGANDAM

Si Gobernador Aris, nagpahigayon sa dinaliang miting Marso 8 didto sa SP Session Hall, New Capitol, Tagbilaran City, tali sa nga mayores sa lalawigang Bol-anon, aron personal nga pangayuon ang suporta sa aktibo nga partisipasyon pagkontrolar sa posibling African Swine Fever(ASF) entry pipila ka adlaw gikan karon human mideklarar ang Cebu Marso 6, nga positibo sa ASF ang 58 ka mga samples nga gikan sa Carcar, Cebu.

Pinaagi sa Office of the Provincial Veterinarian (OPV) Head Stella Marie D. Lapiz, giat-at ug gipasabot ang kamahinungdanon sa partisipasyon sa mga Local Government Units sa malampusong pag-implementar sa E.O. No.11, Series of 2023 PROHIBITION ON THE ENTRY OF LIVE PIGS, PORK, PORK PRODUCTS AND FROZEN SEMEN FROM THE ISLAND PROVINCE OF CEBU AND CEBU CITY INTO THE PROVINCE OF BOHOL. Ang maong E.O. gipakanaog subay sa Provincial Ordinance No.2022-011 ug sa kasamtangang kritikal nga sitwasyon batok ASF.

Mahinumduman nga una nang gipadagan ang Memorandum Sirkular 2023-0187 Pebrero 26, 2023 ngadto sa mga Mayores gikan sa buhatan ni bise gobernador Dionisio A. Balite ug giaprobahan sa gobernador ang, CREATION OF CITY/MUNICIPAL AFRICAN SWINE FEVER TASK FORCE (ASF-TF) AND SUBMISSION OF CONTINGENCY PLANS IN DEFENSE TO ASF.

Ang maong memorandum nagpunting pagmugna sa City/Municipal African Swine Fever Task Force(ASF-TF) ingon nga kabahin sa contingency planning.

Paghatag direktiba sa ilang masigkabarangay paghimo sa ilang kaugalingong ASF Task Force.

Pahugtan ang kasayuran sa Liga ng mga Barangay bahin sa epekto sa ASF sa ekonomiya.

Pagmuntar og pagpatuman sa contingency planning sa panahon nga adunay outbreak ug pag-agni sa kooperasyon sa mga hog farm operators ug slaughterhouses pag adaptar og estrikto nga biosecurity measures ug kontrol batok ASF.

Gipasabot ni Lapiz ang panginahanglan nga matag LGU andam sa parallel indemnation sa panahon kung dunay outbreak.

Matod pa nga ang mga balaodnon nga nahisgutan gipatuman aron pagpanalipod sa 48,000 nga mamuhiay og baboy sa Bohol diin gibanabana nga kantidad ang maong hog industry sa 6 bilyones.