Upat ka lungsod sa probinsya sa Bohol nga giilang maoy pinaka apektado sa milabay nga bagyong Odette niadtong Disyembre 16, 2021, ang makadawat sa PhP 100,000,000.00 gikan sa Office of the President Socio-Civic Projects Fund(SCPF). Kini, human mapirmahan ni Gobernador Aris Aumentado ang Memorandum of Agreement (MOA) bahin niini, uban sa mga hingtungdan nga lungsod. Kabahin kini sa Post-Typhoon Odette Rehabilitation nga gipatuman sa probinsya.
Sa mensahe ni Gov. Aris atol sa maong MOA Signing, iyang gidasig ang mga mayor isip representante sa tanang mga benepisyaryo sa ilang lungsod nga magpadayon sila pagkugi pagpangita ug pagpaabot sa mga ayuda ngadto sa mga hingtungdan. Ang kalamidad muabot bisan anus-a busa gikinahanglan ang pagpangandam sa tanang panahon. Kini gitawag nga pagpalig-on sa Public Resiliency, Recovery and Rehabilitation sa probinsya.
Ang Provincial Administrator Aster Caberte nga presente sa maong kalihukan, miekspresar sa iyang dakong kalipay sa dihang adunay miabot nga mensahe gikan sa kauluhan, nga ang Malacanang magahatag ngadto sa Bohol sa kantidad usa ka gatos ka milyon ka pesos alang sa resettlement sa mga pinakaapektado niadtong maong bagyo, ubos sa Shelter Disaster Resiliency Projects. Sibo kini sa katuyuan ni PA pagtabang sa pangagamhanang probinsyal nga karon gipanguluhan ni Gobernador Aris Aumentado. Gitugyan sa gobernador ngadto sa Provincial Administrator ang pagdumala nga makaabot ngadto sa mga biktima sa bagyo ang tabang gikan sa Malacanang. Gimugna ang Provincial Shelter Cluster Core Team aron matutukan kining maong proyekto.
Aktibo sa ilang pagsuporta niining maong resettlement project ang Provincial Planning and Development Office (PPDO) pinanguluhan ni Atty. John Titus Vistal ug Ronilita Bonado, Office of the Social Welfare and Development Office(OPSWD) pinanguluhan ni Mita Tecson, Provincial Engineering Office(PEO) pinanguluhan ni Engr. Camilo Gasatan, Provincial Legal Office(PLO), First Consolidated Bank Incorporated(FCBI)Virginia Dela Cuesta, ug ang upat ka mga LGU nga mao ang Talibon, Ubay, Loboc ug Pres. Carlos P. Garcia uban sa ilang tagsa-tagsa ka mga Municipal Shelter Cluster Team.
Upat ka mga lungsod ang tukma sa criteria nga gilatid sa pag-ila kinsa ang pagahatagan sa resettlement fund gikan sa kauluhan.
Human sa maong pag-identify sa mga benepisyaryo, unang naglusad sa ilang Resettlement Center ang lungsod sa Talibon sa pagpangulo ni Hon. Janette A. Garcia sa barangay San Carlos Oktubre 6, 2022 pinaagi sa ilang Groundbreaking ug Capsule Laying Ceremony uban ang presensya sa gobernador.
Ang lungsod sa Ubay, Evacuation Center ang priority ug kauban sa mga SB ug Barangay Officials gipahigayon ni Gov. Aris didto sa Barangay Camambugan ang ilang Groundbreaking Ceremony.
Si Mayor Fernando Eping Estavilla sa Pres. Carlos P. Garcia, nagpahigayon usab og Groundbreaking sa ilang Evacuation Center didto sa barangay Pitogo uban ni Gov. Aris.
Disyembre 22, si mayor Raymond Jala kauban sa gobernador nagpahigayon usab sa Capsule Laying ug Groundbreaking Ceremony sa barangay Calunasan alang sa ilang Resettlement Project.
Sa maong MOA makadawat ang matag benepisyaryo nga lungsod sa kantidad PhP 25,000,000.00 alang sa paghatag og mas maayong kahimtang sa mga biktima nga nawad-an og panimalay o, anaa sa dili na luwas puy-an nga dapit.
Ang Kagamhanang Probinsyal nagatan-aw usab sa ekonomikanhong aspeto o socio-economic nga kahimtang sa mga benepisyaryo, diin mutabang bahin niini ang PCDO, OPV ug OPA. Giawhag ang mga benepisyaryo nga muduol ngadto sa mga ahensya nga andam mutabang sama sa TESDA, DOLE, DTI, FCBI kay suportado kini sa Provincial Government.
Nanghinaot ang gobernador nga aduna pay muabot nga mga hinabang aron matabangan ang ubang nabiktima sa maong bagyo.
Sa maong kalihukan, anaa usab ang Bise Gobernador Dionisio Victor Balite, ang representante ni Mayor Janette Garcia nga si Municipal Assesor Ramel Artiaga, PA Aster Caberte , ang mga mayores sa nahisgutan nga mga lungsod, ug ang representante sa FCBI nga si Virginia Dela Cuesta.
No comments:
Post a Comment