NIA REGION 7 STAKEHOLDERS FORUM GIPAHIGAYON SA BOHOL PROVINCE

Nagtapok ang nagkalain-laing matang sa mga irrigators associations gikan sa Cebu, Negros, Siquijor ug ning maong probinsya didto sa Grand Pavillion, Panda Tea Garden Suites syudad sa Tagbilaran, adlawng Byernes Enero 27, 2023. Kini, tungod kay ilang gitambungan ang Stakeholders Forum nga gipahigayon sa National Irrigation Administration (NIA)Region 7 diin mismo ang bag-ong NIA Administrator nga si Engr. Eduardo Eddie G. Guillen ang Keynote Speaker sa maong okasyon.

Sa ilang panagtapok anaa ang presensya ni Gobernador Erico Aris Aumentado kauban ni First District Congressman Edgar M. Chatto, Project Management Officer, NIA Central Office nga si Doc Leo L. Gallego, Acting Regional Manager, NIA R7 nga si Engr. Reyne B. Ugay, Regional Confederation of Irrigators Associations (RCIA) Federation President Ireneo P. Leuterio, RCIA federation Vice Pres. Agustin Maramara, NIA Employees Association of the Philippines (EASP)R7 Chapter, President Elvira H. Alvarado ug uban pang mga IAs.

Presente usab ang mga mayores sa kalungsuran nga sila si Calape Mayor Julius Caesar F. Herrera, Trinidad Mayor Roberto C. Cajes, Garcia Hernandez Mayor, Jess V. Baja, Antequera Mayor Jose Mario Pahang, Ubay Mayor Constantino Reyes, San Miguel Mayor Ian Gil Mendez, Danao Mayor Jose Joe Cepedoza ug mga representante sa ubang kalungsuran.

Gipasabot sa bag-ong NIA administrator nga sa iyang pagdumala, ang ilang mga panglimbasog naka-angkla sa usa ka “sustainable and inclusive rural development”. Iyang giawhag ang panaghiusa kay nagkalain-lain man ang ilang pamaagi apan managsama ang ilang kaaway nga mao ang kapobrehon.

Si Congressman Chatto midayeg sa track record ni Engr. Guillen ug miekspresar kini sa iyang kumpyansa sa pagdumala sa bag-ong administrator.

Sa mensahe ni Gov. Aris, gipasalamatan sa gobernador ang pagbisita ni Engr. Eddie sa probinsiya. Giila ni Gov. Aris ang katakos niini sa pagdumala ilabina nga si Engr. Guillen, nagsilbi sulod sa taas nga panahon sa iyang yutang natawhan isip mayor , ang lungsod sa Piddig, Ilocos Norte, una kini nahimong administrador.

Atubangan sa mga stakeholders, gipasalig sa gobernador ang iyang bug-os nga suporta sa NIA-7 sa mga nakalatid nga programa sa NIA Administrator, aron pagkab-ot sa damgo nga ang Bohol mahimong “Rice -Sufficient” nga probinsya.

Sa maong panagtapok, gipahigayon ang open forum diin gihisgutan ang nagkalain-laing problema nga may kalabutan sa mga programa sa NIA, ilabina bahin sa mga proyekto nga hangtod karon wala pa mahuman, kakuwang sa koordinasyon sa mga naglihok sa proyekto ngadto sa mga opisyales sa local Government Unit ug uban pa. Ang mga issues and concerns, gipatalinghugan ni Engr. Guillen ug gikuha ang mga detalye aron kini matutukan.

Gipanguluhan sa NIA Administrator ang pagpahigayon sa Pledge ug Commitment, human matapos ang open forum.

Maoy panglantaw ni Engr. Guillen nga ang NIA dili lamang kutob ra sa pag-atiman nga makabaton ang mga mag-uuma sa gikinahanglang tubig sa pagpananom kundili nga makunhuran gyod ang kapobrehon sa nasod pinaagi sa pagpangita og solusyon sa mga problema sa mga mag-uuma bahin sa ilang pagpanguma. Apil na niini ang pagsiguro nga sa mga programa, adunay “economic multiplier effect” diha sa labing ubos nga hut-ong sa katilingban o “grassroots level”. Apil na niini ang pagmugna og usa ka social enterprise nga makatabang sa mga benepisyaryo.

Si Guillen gi-appoint ni Presidente Ferdinand R. Marcos sa maong posisyon Disyembre 9, 2022, isip hulip kang Benny Antiporda nga maoy administrador sa NIA sugod Hulyo 29 sa miaging tuig.