PAFEC GILUNSAD SA PROBINSYA SA BOHOL

Matod sa gobernador, dili babag ang managlahi nga baruganan kung kaayuhan sa katawhan ang katuyuan, gumikan kay ang mga magbabalaod sa Sangguniang Panlalawigan, andam makighiusa sa usa ka tumong tungod ug alang sa kinabag-an. Aminado niini ang mga Board Members nga mitambong sa paglusad sa Province-led Agriculture and Fisheries Extension Center (PAFEC) didto sa Governor’s Mansion, Tagbilaran City, Enero 26, adlawng Hwebes.

Sa maong Launching Ceremony ug MOA Signing anaa ang presensya sa mga board members nga mao sila si Hon. Venzencio Arcamo, Hon. Aldner Damalerio, Hon. Nathaniel Binlod ug Hon. Lucille Lagunay.

Sa mensahe ni Atty. Salvador Diputado, ang DA Assistant Secretary for the Visayas, siya nagkanayon nga usa sa hinungdan nga mas nauna ang probinsya sa Bohol paglusad sa PAFEC, kaysa priority province sa Region VII, kini, gumikan sa managsamang commitment ni Gov. Aris ug sa Sangguniang Panlalawigan nga maoy muhimo og balaodnon pag-endorsar bahin sa PAFES (Province-led Agri-Fishery Extension Services) uban ang pag-aprobar niini sa gobernador ug ang paghatag sa SP og gahom ngadto sa gobernador pagsulod og Memorandum Of Agreement sa maong nahisgutan.

Si Gobernador Aris, sa iyang mensahe ngadto sa mga stakeholders nagkanayon nga, ang PAFES kabahin sa devolution sa Agri-Fishery Extension Services gikan sa Nasyonal ngadto sa Kagamhanang Probinsyal aron sa pagpalambo sa agrikultura, partikular sa pagpanguma ug panagat nga magsugod sa kinaubsang bahin sa komunidad.

Ang PAFEC, usa ka coordinating center ug operation hub diin didto gihiusa ang mga plano ug programa uban sa paghapsay sa mga aktibidadis niini aron dal-on ngadto sa gitawag nga “grassroots level”. Tumong niini nga mapalig-on ang produksyon ug kita sa mga agri-fishery sector, musaka ang seguridad sa pagbaton og igong pagkaon, muuswag ang panginabuhian sa mga kabalangayan ug mulambo ang agrikultura.

Pinaagi sa PAFEC pagasubayon ang matuod nga panginahanglan sa anaa sa ubos nga hut-ong sa katilingban, eendorsar kini ngadto sa Kagamhanang Nasyonal alang sa implementasyon ug paggahin og pondo. Tumong niini nga mas mapauswag ang maong extension services maingun man ang pagpanghatag sa technical ug marketing assistance ngadto sa mga farmers ug fisherfolks.

Gisugdan ang PAFEC sa miaging tuig, sa administrasyon ni kanhi Pres. Rodrigo Duterte, human gipahiluna ang daghang mga pagtuon, ingon nga katimbang sa implementasyon sa Mandanas-Garcia ruling, kini maoy giluwatan kaniadto, sa kanhi DA Secretary William D. Dar.

Upat ka mga gikinahanglan aron mahimong reyalidad ang PAFEC mao ang pagpahibalo niining maong programa ngadto sa mga hingtungdan ug pag-organisar kanila alang sa maong katuyuan, paghimo ug balaodnon sa Sangguniang Panlalawigan alang sa endorsement uban ang approval sa gobernador, pagpahigayon sa MOA Signing sa mga partners, pagbaton og PAFEC Office partikular alang niining maong programa ug ang mapping out sa Collaborative Provincial Agriculture and Fisheries Extension Program (CPAFEP).

Ang DA-RFO VII, pinaagi ni OIC-Executive Regional Director DA-7 Joel A. Elumba, ug ang PLGU-BOHOL pinaagi ni Gov. Erico Aris Aumentado mao ang nag-unang gitahasanan alang sa implementasyon niini. Anaa usab ang Office of the Provincial Agriculturist (OPA) pinaagi ni Larry Pamugas ug Office of the Provincial Veterinarian (OPV)pinaagi ni Stella Marie D. Lapiz kansang financing counterpart magagikan partikular sa ilang panudlanan.

Apil sa mitambong sa seremonya mao ang Agricultural Training Institute-7 (ATI) nga girepresentahan sa OAP Focal Person Gracia S. Pungay ug mga kaubanan, Academe nga gisalmutan sa Bohol Island State University (BISU) tinambungan ni Proceso Castil ug mga kaubanan, Philippine Coconut Authority (PCA) nga girepresentahan ni Alven Curiba, Civil Society Organizations (CSO)/ Peoples Organization (PO) nga girepresentahan ni KABoOM Pres. Marilou Escalona , Philippine Statistics Authority (PSA) representative Nicefora L. Marimon, National Irrigation Authority (NIA), ug uban pang mga stakeholders.

Atol sa maong kalihukan, adunay libreng paniudto ngadto sa mga stakeholders nga gidalit gikan sa ATI. Pagkahuman sa simpleng salo-salo, gipahigayon ang mubo nga programa aron sa pagpasabot kung unsa ang PAFEC. Gisunod dayon ang pagpirmahanay sa Memorandum of Agreement bahin sa Co-financing niining maong programa diin 30% niini magagikan sa DA kantidad One Hundred Eleven Million, Three Hundred Eighty Thousand Two Hundred Twenty Pesos (P111,380,220.00) ug 70% gikan sa Kagamhanang Probinsyal sa kantidad Three Hundred Forty Two Million, Three Hundred Eighty Eight Thousand Three Hundred Fifty Two and Nineteen Cents (P342, 388,352.19). Gipahigayon usab ang ribbon cutting alang sa bag-ong office sa PAFEC nga anaa mahimutang sa Governor’s Mansion.

Maoy panglantaw sa tanang mga stakeholders nga magmalampuson ang maong programa ug makatabang pagpaabante sa kalidad sa panginabuhi sa mga anaa sa kapit-os karon nga mga mag-uuma ug mga mananagat.