BACK-TO-BACK NGA KALAMBOAN SA BILAR UG TUBIGON

Adlawng Sabado apan si Gobernador Aris, padayon sa iyang pagserbisyo ngadto sa katawhang Bol-anon.

Sa ika 21 ning buwan sa Enero unang giadto sa gobernador ang Lungsod sa Bilar. Gipanguluhan ni Gov. Aris ang pagpahigayon sa Capsule Laying ug Groundbreaking Ceremony sa usa ka PRDP project nga gipondohan sa World bank og 80% ang kinatibuk-ang kantidad, samtang 10% counterpart sa Department of Agriculture ug laing 10% counterpart sa Provincial Government.

Ang nahisgutang proyekto mao ang rehabilitasyon sa 10.977 km. road gikan sa barangay Campagao-Dagohoy-Bonifacio-Cabacnitan diin, gitawag kini nga kinatas-ang circumferential road sa lungsod sa Bilar. Nagkantidad kining maong proyekto og P170, 521,136.70.

Sa maong kalihukan, kauban sa gobernador, ang mayor sa Bilar nga si Hon. Norman Palacio, bise mayor Hon. Ronie Maligmat, ang mga Sangguniang Bayan Members ug ang Municipal Planning Development Officer.

Anaa usab ang Deputy Project Director sa PRDP Regional Project Coordination Office nga si Engr. Cirilo Namoc, PPDO Project Executive Officer IV Romelita M. Bonado, Engr. Camilo Gasatan, Engr. Junin Caberte, ug ang mga Barangay Officials sa nahisgutang upat ka barangay nga hingtungdan.

Sa mensahe ni Gobernador Aris, iyang gidasig ang mga direkta nga benepisyaryo sa maong Farm-to-Market Road Project nga higugmaon ug atimanon kining maong proyekto. Gihisgutan sa gobernador, kung unsa kalisod ang giagiang proseso aron lang makabaton og katumanan kining maong proyekto, gipanglimbasogan kini nga mahipno sugod sa tuig 2016.

Giila sa gobernador ang partisipasyon sa kanhing administrasyon aron masugdan kining PRDP Project. Sa miaging tuig dako ang kabalaka sa mga naglihok niini, diha sa Kagamhanang Probinsyal nga basin matunaw ang pondo tungod adunay mga kakulian busa sa diha nga si Gov. Aris milingkod na isip Gobernador, mitabang kini pagpaningkamot sa pagpahigayon nga mahimong reyalidad ang gidamgo sa mga Bilarnon nga piskay ug dako nga mga kalsada.

Human sa maong pagsubo, mitambong ang gobernador sa uban pang mga kalihukan ayha mipatighulog sa Lungsod sa Tubigon.

Sa paghiabot sa Lungsod sa Tubigon, mederecho ang gobernador sa Mater Dei College Activity Center aron ipahigayon ang turn-over sa mga nagkalain-laing fishery equipment sama sa fish corral (bunsod), bottom set gillnets, mga baroto ug boat repair materials ngadto sa mga benepisyaryong mananagat.

Gipasalamatan ni Gobernador Aris ang Bureau of Fisheries and Aquatic Resources (BFAR) sa ilang panglantaw nga masangkapan ang mga mananagat sa dugang ayuda nga kahimanan sa ilang pagpanagat uban ang pakig-alayon sa Local Governmet Unit (LGU) sa Tubigon kauban ang Kagamhanang Probinsyal aron masiguro ang paglambo sa mga benepisyaryo.