ANG SELEBRASYON SA NATIONAL ARTS MONTH GIPAHIGAYON SA KAPITOLYO

Sadya ang flag ceremony sa kapitolyo sa unang Lunes ning buwan sa Pebrero tungod kay miduyog ang Provincial Government sa selebrasyon sa National Arts Month nga gidumala sa Center for Culture and Arts Development (CCAD).

Pagkahuman sa Flag Raising Ceremony, gihimo ang pagpapanumpa sa mga bag-ong napili nga Council Executive Board sa Bohol Arts and Cultural Heritage Council (BACH).

Si Gobernador Erico Aris Aumentado isip mao ang Honorary Chairman sa BACH, aduna na’y bag-ong katimbang sa Executive Board nga mao sila si Argeo M. Melisimo isip chairperson , ug Atty. Jiselle Rae A. Villamor nga mao ang vice-chairperson. Napili nga secretary si Athena G. Vitor, treasurer si Vida May Tirol De Juan , Auditor si Aurelio Salgados ug Executive Director si Emerson Pinos. Anaa usab ang mga Section Heads nga mao sila si Sherwin Sapong sa Arts, Fr. Ted Torralba sa Heritage, Argeo M. Melisimo sa Culture and Development ug Bonifacio Quirog sa Culture and Governance. Ang matag section head adunay committee head ug mga membro nga gidumala.

In behalf sa gobernador mihatag sa iyang mensahe si Provincial Administrator Aster Caberte agi og pagdasig ug pagpasalamat sa umaabot nga dakong kontribusyon sa Bach Council aron sa pagpatuman sa atong probinsya sa bag-ong gipakanaog nga Philippine Creatives Act. Matod ni PA Caberte nga 3% ang natampo sa Creative Industry sa tibuok kalibutan diha sa adlaw-adlaw nga lakaw sa kinabuhi. Inspirasyon alang kaniya nga kung ang Cebu giila nga City of Design ug ang Bohol Island Geopark nahimong usa sa mga pagapilian sa United Nations Educational, Scientific and Cultural Organization (UNESCO ) nga mahimong kabahin sa Global Geoparks Networks sa Asia-Pacific ug sa tibuok kalibutan ang probinsya aduna pa’y daghang pwedeng ipakita sa larangan sa atong sining ug kultura pinaagi sa liderato karon ni Argeo Melisimo.

Mihatag usab ang bise-gobernador sa iyang makapadasig nga mensahe ug pangindahay nga ma-abri ang mga mata ug kasing-kasing sa mga Bol-anon bahin sa kaanyag sa Bol-anong kultura. Sa tema nga “Ani ng Sining, Bunga ng Galing, Ani sa Alampat Bunga sa Kahanas”, gi ekspresar niini ang iyang suporta sa Bol-anong Kultura.

Gipahigayon ang ribbon-cutting bahin sa pagsugod sa selebrasyon sa Arts Month ug sa Solo Exhibit ni Mr. Elvin Perocho Vitor, diin gipanguluhan kini ni PA Caberte ang maong ribbon cutting uban ni bise-gobernador Dionisio Victor Balite ug ni Argeo Melisimo.

Gilusad ang Solo Exhibit sa mga obra maestra ni Mr. Vitor sa Tema nga Mugna sa Bulawanong Hunahuna, diin nagsugod kini niadtong Pebrero 6, ug mulungtad kini hangtod sa Pebrero 13.

Si Mr. Vitor ulitawo, 28 anyos ug mitapos sa iyang Bachelor of Fine Arts sa University of Bohol (UB), adunay kahanas bahin sa visual arts. Ang ABS-CBN, GMA ug ang Pilipino Star Ngayon Digital platform mi feature sa iyang mga mugna. Nagapadayon kining tubong Baclayon sa pagpasundayag sa Boholanong Sining ug Kultura ngadto sa nagkalain-laing suok sa Pilipinas ug sa gawas sa nasod. Kasamtangan nga anaa sa preparasyon si Elvin alang sa iyang Art Show sa Indonesia ug Taiwan sa buwan sa Marso.

Si Gobernador Aris Aumentado mi ekspresar sa iyang kalipay sa maong mga kalamboan ug mipahalipay ngadto sa visual artist nga si Elvin Perocho Vitor. Mipahalipay usab ang gobernador ngadto sa bag-ong BACH Council Executive Board.