“This is a testament to the commitment of the current leadership to bring closer to the people; health, and social services”. Matod pa, kini ang diwa sa BOTIKA SA KAPITOLYO ug CAPITOL MEDICAL CLINIC nga gilusad Pebrero 14, isip kabahin sa Love Month Celebration.
Gipakita sa Kagamhanang Probinsyal, sa liderato ni Gobernador Erico Aris Aumentado, ang matuod nga gugma pinaagi sa paghatod sa mga nag-unang serbisyo medikal ngadto sa katawhan Bol-anon.
Tumong sa Botika sa Kapitolyo nga matabangan ang mga indigents pagbaton sa kasagarang tambal nga ilang gikinahanglan. Matod sa Governor’s Office-Special Projects Section (GO-SPS) Head Mr. Metodio Maraguinot Jr., nga ipresentar lang ngadto sa botika ang resita sa doktor. Ang maong resita gikinahanglan una nga maipakita ngadto sa Constituency Services Section (CSS) ground floor sa Kapitolyo, aron mahatagan sa referral note. Ang referral note kinahanglanon alang sa hapsay nga inventory sa tambal. Kung nawala ang resita, mahimo nga magpakonsulta sa Capitol Medical Clinic.
Ang Capitol Medical Clinic pinaagi sa pagtambayayong sa Bohol Provincial Employees League (BOPEL) ug Provincial Health Office (PHO) nagatutok sa pagresponde ngadto sa mga empleyado sa Provincial Government nga nagakinahanglan sa dinalian nga serbisyong panlawas samtang anaa sila sa ilang trabaho. Sa gihapon gikinahanglan ang resita aron makakuha og tambal gikan sa botika. Tungod kay nagasugod pa ang operasyon, limitado ang mga serbisyo ug tambal nga ginadalit ngadto sa publiko. Maoy kalab-uton sa probinsya nga mas daghang Bol-anon ang makabenepisyo ning maong gasa. Busa ginapaningkamutan nga ma-institutionalized ang maong proyekto.
Mahinumduman nga ang mga tambal nga kasamtangan anaa karon sa Botika sa Kapitolyo, kasagaran niini donasyon gikan sa gawas sa nasod alang sa mga pagahimoong Medical Missions. Busa gikinahanglan nga makaabot ngadto sa masa kining maong mga tambal. Ang Bohol Information and Communication Technology Office (BICTO) mitabang pagpahiluna sa system aron makahatag sa ensaktong husay sa matag tambal nga mugawas gikan sa Botika sa Kapitolyo. Kini, aron mamintinar ang Limpyong Gobyerno.
Taliwala sa maulan nga kabuntagon, malampuson nga gipahigayon ang Ribbon Cutting ug Blessing Ceremony sa maong proyekto, sa pagdumala ni Gobernador Aris, PA Aster Caberte, Mr. John Maraguinot ug Susan Datahan, ang Presidente sa BOPEL. Anaa usab sa maong okasyon ang PHO Head nga si Dr. Reymoses Cabagnot.
Ang botika ug clinic anaa mahimutang sa kanhi nga DPWH Bldg., duol sa New Capitol Building ug abri kini Lunes hangtod sa Byernes gikan alas 8 sa buntag hangtod alas 5 sa kahaponon.
No comments:
Post a Comment