Ang Department of Agriculture Region7 mipahigayon sa Launching ug Distribution sa Fertilizer Discount Voucher (FDV), Pebrero 20, 2023 didto sa Carmen Cultural Center, Carmen, Bohol, alang sa 36,426 ka mga Rice Farmer Beneficiaries (FB) nga rehistrado sa Registry System of Basic Sectors in Agriculture (RSBSA). Ang maong aktibidad gisuportahan sa Provincial Government pinaagi ni Gobernador Erico Aris Aumentado ug sa mga Local Government Units.
Kining maong programa nga adunay budget kantidad P92, 219,287.00, adunay 45 ka mga lungsod nga deriktang benepisyaryo gumikan sa ilang mga RSBSA Registered Rice Farmers. Ang kinatibuk-ang luna nga sakop niini mukabat sa 13, 972 ka ektarya nga basakan apan wala mahiapil niini ang Tagbilaran City, Panglao ug Dauis gumikan nga sa pagkakaron wala pa’y basakan kining maong tulo ka lungsod.
Giabi-abi ni Mayor Conchita “Che” Toribio Delos Reyes, si Gobernador Aumentado, si Board Member Nathaniel Binlod, Agriculture Production Coordinating Officer (APCO)Roman Dabalos, Rice Focal Person Bernard Limbaga, gikan sa DA7 Cecille Opada, gikan sa Provincial Development Cooperative Office (PCDO) Gil Bongato, gikan sa Office of the Provincial Agriculturist(OPA) Lorebien Lagapa ug mga Municipal Agriculturist sa nagkalain-laing mga lungsod.
Si DA7 Regional Director Joel A. Elumba girepresentahan sa Regional Technical Director for Operations DA RFO7, Engr. Cirilo N. Namoc. Si Congresswoman Alexie Tutor girepresentahan usab ni Mr. Rey Casenias Jr. ug Mr. Antonio Inte, samtang ang Bise Gobernador representahan ni Engr. Edgar Luardo.
Ang Municipal Agriculturist sa Carmen, Ms. Arene Cabusao, nagkanayon nga ang mga FBs pagahatagan og Fertilizer Discount Voucher (FVD) diin didto nakapatik kung pila ang kantidad sa Urea nga ilang madawat sumala sa gidak-on sa ilang basakan.
Si Mr. Roman Dabalos mipasabot nga ang mga mag-uuma nga adunay usa ka ektarya nga basakan makadawat sa sinako nga Urea kantidad ug P6,600.00. Sa matag ektaryang basakan nga adunay abono, 4.2 tonelada ang target yield niini. Ang mga mag-uuma nga wala muabot og usa ka ektarya ang ilang basakan basta rehistrado sa RSBSA makadawat gihapon sa maong abono.
Si Gobernador Erico Aris Aumentado nagpasalamat sa Presidente, sa Regional Director ug sa tulo ka mga kongresista, sa ilang pagsuporta niining maong intervention. Pagdugang ni Aumentado, ang mga kongresista mao ang nagpahigayon nga makakuha ug budget ang mga programa sa Kagamhanang Probinsyal. Midasig usab ang gobernador ngadto sa mga mag-uuma nga magtinabangay aron magmalampuson kining maong programa nga gipahigayon sa Department of Agriculture.
No comments:
Post a Comment