Si Mr. Rafael Aboitiz, usa sa mga nagpadagan sa ABOITIZ EQUITY VENTURES INC. personal nga mibisita ngadto kang Gobernador Aris Aumentado, didto sa kapitolyo adlawng Lunes, Pebrero 20 aron mahikay ang uban pa nga kinahanglanon alang sa ilang pagtake over sa Bohol-Panglao International Airport (BPIA).
Kauban ni Mr. Rafa sa maong courtesy visit si Mr. Vincent P. Tan ang VP for Corporate External Relations sa Aboitiz ug si Mr. Anthony Noel.
Mainitong giabi-abi sa gobernador ang mga investors samtang gihisgutan niini ang ilang mga maayong plano para sa BPIA. May posibilidad nga sa dili pa matapos ang tuig 2023 ang Aboitiz na ang mupadagan sa airport. Kung walay kausaban, ang maong airport pagadumalahon sa Aboitiz sulod sa 35 ka tuig. Adunay Memorandum of Agreement tali Aboitiz Equity Ventures Inc. ug Civil Aviation Authority of the Philippines(CAAP) sa maong take-over busa dako kini nga advantage ngadto sa katawhang Bol-anon.
Ang kongresista sa Segundo Distrito, Hon. Vanvan Aumentado naminaw sa maong mga plano, ug misugyot nga magbutang usab og usa ka lugar diha sa BPIA nga instragrammable aron pwede ang mga turista makapahulagway sa ilang pag-abot sa airport.
Samtang ang Provincial Administrator, nga kanhi DTI Assistant Secretary, Asteria Caberte, mipahayag mas maayong mahatagan unta og pagtagad ang mga concessioners aron mas mapakusgan ang negosyo sa diha sa airport.
Matod sa 33 anyos nga Aboitiz, , kasamtangan pa nga ginasubay kung maayo ba ang kahimtang sa communication system, power, connectivity, sorroundings ug communication towers aron mapangitaan og paagi kung aduna’y mga kakulian bahin niini.
Si Gobernador Aris, mipasalamat sa Aboitiz Equity Ventures Inc. gumikan sa ilang dako nga pagsalig sa Bohol.
No comments:
Post a Comment