Gipasiugdahan ni Gobernador Aris Aumentado isip representante sa Kagamhanang Probinsyal ang Groundbreaking Ceremony sa 4.740 kms nga Farm-to-Market Road Project nga mahimutang sa Lungsod sa Loon, kantidad P91, 448, 601.20, kansang pondo gikan sa World Bank, ning ika 18 sa Enero, adlawng Martes. Sa maong kantidad, 10 porsyento niini gikan sa counterpart sa Provincial Government ug laing 10 porsyento gikan sa Department of Agriculture.
Usa kini ka Philippine Rural Development Project (PRDP) nga mapahimuslan sa labing menos 2,583 ka mga indibidwal ug gilangkob sa 4 ka barangay nga mao ang Pondol, Bahi, Nueva Vida ug Candaigan. Ang LGU, mao ang gitahasan sa paghapsay sa tanang mga dokomento niini ilabina ang mahitungod sa mga right of way. Ang mga barangay nga hingtungdan, adunay kaakuhan sa pagmintinar nga ang maong proyekto ilang atimanon sa higayon nga kini pwede nang mapahimuslan.
Sa mensahe nga gipadangat sa gobernador iyang giila ang inisyatibo sa kanhing administrasyon alang niining maong proyekto.
Mahinumduman nga mikabat sa taas nga panahon ang pagproseso sa mga papel niini gumikan sa daghang mga kakulian, diin naapsan sa pagkabag-o sa administrasyon. Sa presenting administrasyon gipaningkamutan kini nga mahipno ug ipadayon ang maong proyekto aron mapahimuslan sa katawhang Bol-anon. Matod sa gobernador nga abri siya sa pagsuporta sa Lungsod sa Loon kay iyang giisip nga kabahin kining maong lungsod sa mga strategic nga mga lugar nga angay hatagan sa pagtagad.
Si Mayor Elvi Peter L. Relampagos ug Vice Mayor Lloyd Peter Lopez sa ilang mga mensahe mipaabot sa dakong pagpasalamat ngadto kang Gov. Aris sa mainitong pagsuporta.
Ang maong Capsule Laying and Groundbreaking Ceremony sa Pondol-Candaigan FMR Rehabilitation gitambungan usab ni Sangguniang Panlalawigan Board Member Lucille Lagunay, Engr. Cirilo Namoc, ang DA PRDP Regional Project Coordination Office 7 (RPCO) Deputy Project Engineer, I-Build Component Head Engineer Marcial Agad, ug uban pang kaubanan sa PRDP, Provincial Engr. Camilo Gasatan, PPDO Executive Project Officer Romelita M. Bonado, Municipal Engr. Noel Castrojo, MPDC Engr. Alan Relator, Municipal Agriculturist Janess Cantones, ang pito ka mga Loon SB Members, Pondol Brgy Captain Gilbert Sevilla uban sa iyang mga kagawad, Bahi Brgy, Captain Milagros P. Orion ug ang iyang opisyales, Candaigan Brgy. Capt. Mario P. Sevilla ug Nueva Vida Brgy. Capt. Rey P. Cano.
Target nga pagasugdan ang proyekto sa sunod nga semana.
No comments:
Post a Comment