Desidido si gobernador Erico Aris Aumentado nga palig-onon ang pag-atiman sa kalikopan nga nahisakop sa teritoryong Bol-anon. Ang maong adbokasiya nahisulod sa iyang ten-point development agenda. Bisan kun kini kasamtangang mi-arangkada na pinaagi sa mga ahensya nga nagtutok niini apan napukaw ang iyang atensyon human misinati og sagunson nga ulan ang tibuok probinsya uban sa pagsaka sa tubig sa mga dam ug kasubaan.
Mahinumduman nga atol sa milabay’ng kadaot sa panahon, giawhag pagbakwit niadtong maong kagabhion Enero 11, ang mga apektadong residente ngadto sa labing duol ug luwas nga mga evacuation center. Ang mga bakwit gihatdan sa gobernador og mga foodpacks, inabagan sa Office of the Provincial Social Welfare and Development (OPSWD) ug uban pang volunteers.
Enero 13, adlawng Byernes, gikahinabi sa gobernador diha sa kapitolyo ang Philippine Institute of Environmental Planners (PIEP). Daghan ang ilang nahisgutan ug apil na niana ang pag-panalipod sa kalikopan.
Adunay duha pa, ka nagkalain-laing aktibidad sulod sa kapitolyo ang gitambungan sa gobernador nianang maong kabuntagon ayha migikan ang tibuok team, paingun sa kalungsuran aron iyang ipadayon ang Meet and Greet uban sa mga barangay opisyales.
Tuod man, unang gibisita ni Gov. Aris mao ang barangay Cagayan sa Lungsod sa Inabanga. Ang panagtapok gipahigayon sa Cagayan Covered Court. Mainitong giabi-abi ni kapitan Louie Francis Abisado ang gobernador. Sumala sa naandan, 6 ka mga opisyales sa barangay ang pakigkitaan sa gobernador gumikan nga adunay mga kaayuhan nga iyang gihatod kanila sa mga kapitanes, tresurera, Barangay Health Workers (BHW), Barangay Livestock Aide(BALA), Chief Tanods ug mga Presidente sa mga Senior Citizens. Gitunol ni Gov. Aris ngadto sa Barangay Lapacan Norte ang kantidad P100,000.00 tabang alang sa ilang multi-purpose building.
Tumong sa gobernador nga ipaduol ang gobyerno ngadto sa katawhang Bol-anon ug ipakita nga adunay panlangtaw ang kagamhanang Probinsyal ngadto sa tanan.
Nianang Meet and Greet, ipanghatag ang mga honoraria sa mga BHW ug BALA. Adunay Tanod Kits , 5 ka kilong bugas ug mga delata nga ipanghatag. Ang Federated Senior Citizens Association makadawat sa P40,000.00 nga hinabang ngadto sa federation ug ang mismong barangay mudawat usab sa kantidad P25,000.00 matag usa. Plano sa gobernador nga manghatag og tag P200,000.00 ngadto sa 1109 ka barangay sa tibuok Bohol, ug ang 5 M sa matag Lungsod. Gihisgutan usab ang Bereavement Assistance kantidad P5,000.00 para sa tanang Bol-anong nahitabuan ug ang Centenarian Assistance kantidad P100,000.00. Kini ug daghan pang mga grasya ang kasamtangang ginapreparar pinaagi sa pagtambayayong sa Sangguniang Panlalawigan nga gipanguluhan ni Bise Gobernador Dionisio Victor Balite aron malampusong igahatag ug mapahimuslan ang mga tabang gikan sa Kagamhanang Probinsyal.
Ang pagsuportar sa gobernador ngadto sa mga Bol-anon wala magadepende sa politikanhong bulok, kay giisip ni Gobernador Aris nga mga kadugo ang mga Bol-anon.
Sa singkwenta kapin ka Lungsod nga nabisita na sa gobernador, nag-ambahan ang mga lungsuranon aron sa pag-abi-abi kaniya, apan sukwahi ang nahitabo sa Lungsod sa Inabanga. Sa singkwenta ka mga barangay sa Inabanga, kinse lamang niini ang naghatag sa ilang panahon pagpakigkita kaniya. Ug sa kinse ka barangay nga mitambong sa Meet ang Greet, pito lamang ka barangay ang gitindugan og kapitan.
Nasagmuyo ang gobernador sa iyang nasaksihan. Luyo sa kadaghan sa iyang giatubang sa matag adlaw apan siya nanglimbasog nga mabisita ang Lungsod sa Inabanga aron masuta ang ilang mga panginahanglan, mahatod ngadto kanila ang mga serbisyo ug maandam ang uban pang tabang alang kanila.
Matod sa usa ka Inabanggahanon, ang usa ka gobernador nga gibuhat ang tanang mahimo aron maatiman ug mapanalipdan ang iyang ginsakupan angayan nga hatagan sa respeto ug pag abi-abi, butang nga gihikaw sa 35 ka mga barangay sa Inabanga ngadto sa pinakataas nga opisyal sa probinsya.
Sa mensahe nga gibilin sa gobernador ngadto sa mga barangay opisyales nga miadto sa Cagayan Covered Court, iyang gipasabot unsa ka importante ang igmat nga pagresponde ngadto sa mga kalihukan sa panggamhanan, ilabina kung para sa kaayuhan sa kinabag-an.
Matod ni Gobernador Aris iyang gihigugma ang mga Inabanggahanon ug andam siya pagpanalipod kanila ug paglaban sa ilang katungod. Niining mga panahona, nahimong hulga sa maong lugar ang epekto sa climate change busa iyang gipahibaw nga pangusgan sa Kagamhanang Probinsyal ang pagproteher sa kalikupan. Ang Inabanga usa sa apektado nga lugar niadtong milabay nga daotang panahon diin adunay 38 ka mga pamilya nga bakwit.
Nagpasalamat ang gobernador sa presensya sa chief of police sa maong aktibidad, nga si PMAJ. Dennis B. Lumor. Miabiso si Gov. Aris kaniya, sa higpit nga pagbantay kung napatuman ba ang mga balaodnon diha sa Lungsod sa Inabanga susama sa pag abiso usab niya sa tanang kalungsuran batok sa pag-abuso sa kinaiyahan ug kalikopan. Matod pa nga ang mga operasyon nga ilegal (kung duna man)kinahanglan hunungon aron mapalipdan ang kalikopan ug ang iyang pinanggang mga kadugong Bol-anon.
Mipahalipay ang gobernador ngadto sa pito ka kapitanes nga maisogong mibarog ug mitahod sa iyang mga implementasyon isip gobernador. Ang maong pito ka kapitanes maoy nag-una sa pagtambong sa Meet and greet. Imbis nga tag P200,000.00 ang plano nga ihatag sa maong kabarangayan, midesisyon si Gob. Aris nga hatagn sa tag usa ka milyon kining pito ka kapitanes.
Usa ka kagawad ang miingon “kasayang sa usa ka milyon, unta mitambong si kapitan sa Meet and Greet sa gobernadora”. Mahinumduman nga sa dihang gibisita usab ni Gobernador Aris ang isla Cuaming sa milabay nga bulan, alang sa medical mission, walay bisan usa ka opisyal sa barangay nga misuporta ug mitabang sa maong medical mission nga gipahigayon sa kagamhanang probinsyal. Ang barangay Cuaming , usa ka barangay nga sakop sa Inabanga. Pagdasig sa gobernador, angay magkahiusa ang mga opisyales pagserbisyo sa katawhan aron magmalambuon ang probinsyang Bol-anon.
No comments:
Post a Comment