Ang batan-on nga gobernador, Hon. Erico Aristotle “Aris” C. Aumentado, napili sa halangdon nga presidente Ferdinand R. Marcos Jr. pagpangulo sa Regional Development Council (RDC) Central Visayas Region isip chairman.
Adlawng Martes, Disyembre 6, gihimo ang Fourth Quarter RDC 7 Full Council Meeting didto sa Quest Hotel sa Syudad sa Sugbu, diin ang gobernador sa mga Bol-anon maoy mi-preside niini. Unang gipahigayon ang Oath-taking sa Co-chairperson nga mao si Mr. Kenneth C. Cobonpue pinaagi sa pagdumala ni RD Leocadio T. Trovela sa DILG 7.
Gipahigayon usab ang Awarding Ceremony sa Search for Outstanding Volunteers sa rehiyon. Kining maong kalihukan pinaagi sa pagtambayayong sa National Economic Development Authority (NEDA) ug Philippine National Volunteer Service Coordinating Agency (PNVSCA).
Gipasidunggan atol sa RDC Meeting ang mga Outstanding Volunteers nga mao sila si Mr. Zacarias C. Mansing para sa adult category. Si Mansing usa ka Person with disability (PWD) nga gikan sa Banilad, Dumaguete City. Alang sa youth category, nakadawat sa award ang usa ka magtutudlo sa Cebu Normal University apan gikan sa Baclayon, Bohol nga mao si Ms. Clareziel D. Ladringan. Ang Base Camp Emergency Response Team Inc.-Cebu (BCERT) maoy napili sa kategorya nga Non- Profit. Ang LGU Negros Oriental nakadawat usab og usa ka special award. Ang maong awarding naghatag og kadasig sa mga volunteers sa pagpadayon sa ilang kakugi pagtabang sa mga nagakinahanglan sa ilang serbisyo.
Makahuluganon alang sa mga Bol-anon kining maong meeting kay kini ang unang higayon nga si Gob. Aris maoy nagpreside isip bag-ong RDC Chairperson. Todo suporta ang Abante Bohol Team alang sa aktibidad sa gobernador. Apil sa maong meeting si PA Aster Caberte, ang Presidente sa League of the Municipalities of the Philippines (LMP)-Bohol, Hon. Mayor Dave Duallo,ug ang DAC Chair Mr. Argeo J. Melisimo.
Ang mensahe sa gobernador nagtumbok sa matinud-anon nga pag-alagad dili lang ngadto sa kaugalingong hurisdiksyon kundili ngadto usab sa tibuok rehiyon uban ang transparency ug integrity. Magmalampuson kini kung adunay pagtinabangay sa tanan nga gitahasan niining maong responsibilidad.
Apil nga gipahinumdum sa gobernador, ang padayon nga pagproteher sa Central Visayas Region aron dili gayod makasulod ang African Swine Fever (ASF) kay kini makaguba sa Hog Industry sa kabisayaan.
Ang ubang agenda mao ang sa pagsaka sa mga taripa ug terminal fee sa Tagbilaran City Port ug ang update bahin sa kasamtangang Panglao-Tagbilaran City Offshore Bridge Connector Project. Mipatighulog ang maong meeting sa pagpalig-on sa local industry busa ginaduso ang “buy local”. Sa probinsya sa Bohol, si Atty. Jiselle Rae “Jamie Aumentado Villamor” nga maoy chairperson sa Trade and Industry isip Board Member sa Sangguniang Panlalawigan, aktibo nga nagkampanya sa “Buy Local Go Local”.
Presente usab niining RDC Meeting si Director Dolores J. Molintas, Ms. Maria Sostheleen C. Padilla ug Director Mary Ann Lucero. Nagpasalamat si Gob. Aris ngadto sa Labawng Makagagahom ug sa katawhan gumikan sa suporta.
No comments:
Post a Comment