SERBISYONG TINUD-ANAY PINAAGI SA MEET AND GREET

Sa ika-kwarenta nga lungsod sa probinsya sa Bohol nga gibisita ni Gobernador Erico Aris Aumentado, ning adlawng Lunes, Enero 9, dayag sa iyang pamayhon nga nadutlan na siya sa kakapoy gumikan sa nagbanos-banos nga uwan ug init, ug napagaw na ang iyang tingog sa dihang mihatag siya sa iyang mensahe.Dili lang sa Meet and Greet nakatutok ang iyang pagtagad. Kada adlaw daghan ang muadto sa iyang panimalay o kaha sa kapitolyo nga nagkinahanglan sa personal niyang pakig-atubang, busa nagkulang ang gobernador sa oras dili lang sa pagpahuway kundili hasta sa paghikatulog.

Apan sama sa iyang amahan nga si late Governor Erico Boyles Aumentado, iyang gikinabuhi diha sa iyang kasingkasing ang iyang saad, panahon sa kampanya, ang Tinud-anay nga Serbisyo. Busa mas tam-is alang kaniya nga unahon pag-atiman ang katawhang Bol-anon.

Dili pa lang dugay, mga biktima sa sunog sa Poblacion 2 ang iyang gikauban sa iyang adlawng natawhan. Mitabok usab siya sa kaislahan aron mahatdan og pangkonsumo ang mga islahanon nga sobrang naapektuhan sa dili maayong panahon.

Niining ikaduhang semana sa tuig 2023, arangkada na usab ang gobernador sa MEET & GREET aron personal gayod niya nga masubay ang kahimtang sa iyang mga konstituwente. Tumong sa gobernador, nga muhaom ang mga programa ug proyekto nga ipadangat sa katawhan aron walay kwarta gikan sa panudlanang probinsyal nga mausik busa ginaplano og maayo ang mga lakang nga pagahimoon.

Sa San Isidro, todo suporta ngadto kaniya si Atty. Diosdado N. Gementiza Jr., ang mayor sa lungsod, kauban ang bise mayor nga si Hon. Felimon R. Mantaboje, ABC President Loreto Antivo, ug ang tanang mga SB Members nga gipanguluhan ni BM Gloria Gementiza, ang kapikas sa kinabuhi sa mayor. Anaa usab ang tanang mga opisyales sa 12 ka barangay nga maoy sentro sa paghimamat. Gitunol ni Gob. Aris ang tseke kantidad P110,000.00 sa mga opisyales para sa Poblacion San Isidro National High School.

Sa dihang didto na si Gov. Aris sa lungsod sa Sagbayan, mainiton siya nga gisugat ni Mayor Restituto Q. Suarez III, Vice-Mayor Sioney Ybanez, SK Federated Aileen Pabonita, ABC President Kap. Betsy Jumamoy ug ang tanang SB Members.

Ang mga barangay opisyales sa 24 ka barangay naghugop usab sa pagpakigkita sa gobernador. Gitunol ngadto sa barangay Sta. Cruz ang tseke kantidad og P100,000.00 para sa ilang office equipment and facility.

Human sa pagtunol sa mga kaayuhan gikan sa Kagamhanang Probinsyal gidalitan ang team ni Gob. Aris sa lamian nga paniudto busa mapasalamaton ang tanan.

Sa pagderecho sa team ngadto sa lungsod sa Clarin, giabi-abi dayon ni Mayor Eugene Ibarra si Gob. Aris ug ang tibuok team kauban ni Vice-Mayor Fernando Camacho Jr. ug sa tanang opisyales. Ang kongresista sa ikaduhang distrito Hon. Vanvan Aumentado abtik usab nga misuporta sa iyang kapikas sa kinabuhi ug kauban sa buhat busa miabot gayod kini sa lokasyon.

Gipahibalo ni Congresswoman Van nga pinaagi sa pagpahigayon sa iyang buhatan adunay P10-M tabang nga ginahan-ay para sa Clarin Solar Water Works. Matod pa sa kongresista nga solusyonan usab ang pagbaha pinaagi sa flood control (sea wall). Daghan pa nga mga plano sa imprastratura ang pagabuhaton apan magpuli-puli una sa pagdawat ang mga benepisyaryo gumikan sa pagkunhod sa budget ning maong tuig. Busa gikinahanglan ang pagsabot, pagpailob ug pagpaabot sa turno pagdawat. Hinuon para sa livelihood, nag-awhag si CVA nga ang mga NGO magpa-accredit ug muduol sa iyang buhatan kay siya mutabang aron makakuha kini og grant bisan kantidad sa P300,000.00 kun maayo ang proposal sa proyekto.

Gipahigayon ang panagtapok sa mga opisyales sa 24 ka barangay diha sa Clarin aron maapod-apod ang mga kaayuhan. Sa maong lungsod dunay 176 ka mga BHW nga makadawat sa ilang mga honorarium gikan sa PGBh ug 197 ka mga Tanod ang makadawat sa Tanod Kits. Presente sa maong kalihukan ang mga kapitanes ug barangay treasurers nga maoy mudawat sa mga tseke para sa barangay kantidad P25,000.00. Ang mga Senior Citizen Presidents adunay P40,000.00 para sa ilang Federated Association samtang ang mga BALA gitunulan usab sa ilang honoraria. Ug ang tanang opisyales nga mitambong sa Meet & Greet miuli nga adunay bitbit 5 ka kilo nga bugas ug canned goods.

Ingon usab niini ang pagadawaton sa mga brgy. opisyales sa Sagbayan nga adunay 181 ka BHW ug 255 ka mga tanods samtang 83 ka BHW sa San Isidro ug 135 ka tanod. Mipasabot si Mr. Oscar Valles(EA-LGA) nga ang mga opisyales nga dili pa membro sa PhilHealth i-enrol usab apan subayon una, aron dili magdoble ug masayang ang pondo. Aprobado na usab sa SP ang Bereavement Assistance Program diin sa matag Bol-anon nga mitaliwan, adunay P5,000.00 cash nga igahatag ngadto sa nahitabuan human maproseso sa hingtungdan ang mga dokomento sulod sa 40 ka adlaw gikan sa hitabo.Nagapadayon ang Centenarian Assistance alang sa Bol-anon nga muabot og usa ka gatus ang pangedaron. Kini ug daghan pa ang ginaplano sa hiniusang pwersa sa Team ABANTE BOHOL ni Gob. Aris, Vice Gov. Balite ug sa SP aron ikahatag sa mga Bol-anon ang labing maayo.

Matod ni Gob. Aris nga muhatag usab sa kantidad P200,000.00 ang Kagamhanang Probinsyal sa 1109 ka mga barangay pagbulig sa proyekto niini busa angayan andamon daan kung unsa ang ilang papondohan nga proyekto kay dili gusto ang gobernador nga masubli ang nahitabo kaniadto nga sa paghatag og tabang, ikontrolar ang barangay sa proyekto nga dili haom ug masayang lang ang pondo. Apan gumikan kay mikabat sa P500-M man ang kunhod sa budget sa probinsya, paghangyo sa gobernador nga magpuli-puli lang ug dawat sa assistance hangtod makadawat ang tanan sulod sa tulo ka tuig nga termino.

Tugbang niana ang matag lungsod pagahatagan usab sa kantidad 5-M abag sa ilang mga proyekto.

Nagpasalamat ang gobernador sa suporta sa mga empleyado nga kanunay miuban sa Meet and Greet aron sa pagpahigayon sa mga tabang alang sa kabarangayan sama ni PHO-BHW Coordinator Artemia Lison, PSWDO Mita Tecson, OPV Anabel Espina, PTO Guia Remolador, LGA uban sa mga EA Oscar Valles, Jun Flores , Nilson Poon ug Stephen Rances. Kauban usab niining adlawa si Mr. Donglee Camacho.

Sa mensahe ni Gov. Aris,iyang ginasubli ang pagpasalamat sa Labawng Makagagahom kay siya nagatuo nga ang tanang oportunidad pagserbisyo sa katawhang Bol-anon Iyang pagbuot, ug klaro nga giubanan gayod sa Kalangitan ang iyang lakaw sa politika.

Sa katapusan nagpasalamat ang gobernador sa tanan, kay nangayo siya sa pabor…gamay nga labaw batok sa iyang kaatbang sa milabay nga piniliay apan ang mga Bol-anon mihatag kaniya sa makabungog nga kadaogan sa 186,000 nga labaw sa boto.

Sa Labawng Makagagahom ang himaya ug kadungganan.