PANAGTAPOK SA BILAR

Kasamtangan nga gipahigayon ang Meet and Greet sa lungsod sa Bilar pinanguluhan ni gobernador Aris Aumentado uban sa team sa Provincial Government, LGU Bilar pinanguluhan ni mayor Norman Palacio, ug ang mga opisyales sa barangay.

Giapod-apod sa gobernador ang mga kaayuhan gikan sa Kagamhanang Probinsyal ngadto sa mga kapitanes ug sa tanang mga opisyales sa barangay. Iyang gipahibaw nga sa umaabot, adunay ipanghatag kantidad P200,000.00 alang sa proyekto sa barangay busa angayan nga andamon na ang resolusyon sa ilang priority project. Kini bunga sa pagtambayayong usab sa Sangguniang Panlalawigan uban sa bise gobernador. Aduna usab ginahan-ay nga igahatag sa lungsod kantidad P5-M.

Gumikan kay tukma ang Meet and Greet sa selebrasyon sa Barangay Tanod Day, alegre ang panagtapok tungod sa presensya sa daghang tanod. Nalipay ang tanan paghimamat sa gobernador.

Sobrang nalingaw ang mga opisyales sa ilang bibo nga panagtapok bisan sa kusog nga ulan. Namauli ang katawhan nga bitbit ang ilang nadawat nga canned goods ug 5 ka kilo nga bugas.