Ang Gugma ni Gobernador Aris para sa mga katawhan sa Isla Cuaming

Makita sa pamayhon ni Gobernador Aris Aumentado, ang dako nga kahinam paghimamat sa mga kaigsoonan sa isla Cuaming, lungsod sa Inabanga. Magapahigayon ug usa ka Civic Action (CIVAC) ang Provincial Government sa maong Isla. Kinuyugan sa mga Peace Officers, dala sa team ang mga tabang ug mga serbisyo nga gipreparar alang sa katawhan ning maong barangay.

Adlaw nga Sabado kadto Nobyembre 26, pagbanag-banag pa lang sa adlaw, mi-arangkada na ang tibuok pwersa sa PGBh gikan sa kapitolyo ngadto sa pantalan sa Clarin. Apil niini ang Provincial Social Welfare and Development Office(OPSWD) sa pagpangulo ni Mita Tecson, Provincial Cooperative Development Office (PCDO) sa pagpangulo ni Maricar Fuentes, Medical Outreach Unit (MOU) ug Provincial Health Office (PHO), diin andam pagserbisyo ang mga doctor sama nila ni Dr. Budyongan, Dr. Dabalos, Dr. Gallego ug Dr. Columnas. Sakay sa dako nga pumpboat ang team sa PGBh nga girumbo ang isla sa Cuaming.

Laing team, mao ang team ni GAA nga didto manukad sa Buenavista, sakay sa speedboat paingon usab sa mao gihapon nga isla.

Sa pag-abot ni Gobernador Aris Aumentado sa isla, dali kini nga mikanog sa speedboat aron sa paglamano sa tanang lumulupyo nga iyang natagbuan samtang nagpaingun siya sa Barangay Hall. Puno sa pahiyom ang iyang panagway samtang nangumusta kanila sama sa usa ka amahan nga gikamingawan ang iyang mga anak. Ang ubang lumulupyo, paraygon usab nga mitimbaya kaniya ug ang uban nagpa selfie.

Nagkadaghan ang mga taw nga nagtapok sa Barangay Hall apan walay opisyales sa barangay nga miabi-abi sa team ni GAA. Hinuon adunay daghang mga volunteers , abtik nga mitagbo kaniya ug miabi-abi. Nahibulong ang gobernador kung asa ra si Barangay Kapitana Flora Espina ug ang iyang mga ginsakpan, ilabina ang mga BHW isip maoy host ug maoy mupahiluna sa mga dala nga gikan sa Provincial Government, busa gipasuguan niya ug mga taw pagsubay kung asa ang mga opisyales. Apan mibalik ang mga gisugo ni GAA ug mitaho nga walay bisan usa sa mga Barangay Officials sa isla Cuaming nga anaa karon niadtong higayona.

Nasagmuyo ang gobernador, sa taras nga gipakita sa mga opisyales nga sa maong Civic Action sa isla, layo pa gayod ang gigikanan sa team, walay bisag usa, bisan tanod o bhw nga miasikaso kanila, ilabina nga hatod sa Kagamhanang Probinsyal ang nagkadaiyang mga serbisyo sama sa dental services, pagpanghatag sa mga tambal ug vitamins human magpa check-up sa mga doctor ug pagpanghatag sa mga foodpacks. Apan, makadasig nga ang mismong mga lumulupyo, dili mga opisyal sa barangay maoy miboluntaryo ug nagkapuliki sa pag-atiman sa team ni Gov. Aris ilabina sa mga doctor nga nagsugod dayon sa ilang trabaho sa ilang paghiabot. Nag-iyahay pagpanguha og lamesa ug lingkuranan gikan sa ilang tagsa-tagsa ka panimalay ang mga residente aron adunay magamit sa kalihukan.

Dinhe napamatud-an sa amahan sa probinsya ang mga huhungihong sa dili makatarunganon nga pagtratar sa mga opisyales ngadto sa yanong mga lumulupyo ning maong dapit. Matod sa mga taho nga adunay mga pagpihigpihig sa mga hinabang ug kaayuhan, kay kung dili nila dumadapig , wala gyod kini malauman gikan sa barangay. Gibati sa Gobernador ang kalooy ngadto sa mga gidaog-daog nga katawhan gumikan sa hiwi nga pamolitika ug pag-abuso sa gahom. Asa ang ilang pagrespeto? Asa ang ang ilang gipanumpaan sa tinud-anay nga serbisyo?

Walay giusikan nga panahon ang gobernador ug gipanghatag ang mga dala nga kaayuhan, samtang padayon ang mga doctor sa ilang check-up sa panlawas sa mga nagpila, mapabata man, senior citizen, buntis ,kalalakinhan ug uban pa.

Sa mensahe nga gibuhian ni Gobernador Aris Aumentado ngadto sa katawhan, niining maong isla, iyang gidasig ang tanan nga dili mahadlok pagbarog sa ilang katungod, kay ania na karon ang bag-ong administrasyon, administrasyong Tatak Aumentado, may kahingawa sa tanang ilalom sa iyang pagdumala, dapig sa mga kabos ug gidaog-daog.

Matod ni Aumentado, siya ug ang iyang kaubanan sa TEAM ABANTE BOHOL ug bisan pa man ang mga barangay opisyales sa Cuaming, bisan pa ang mayor ug ang tibuok ginsakupan sa lungsod sa Inabanga, pareho ra nga mga “public servants” busa dili siya makatugot nga daog-daugon ang katawhan, ug lupigan sa katungod.

Siya nagkanayon nga gikapungtan niya ang mga pagpihigpihig, pag-abuso sa gahom ug naghinubra nga pamolitika. Sa iyang administrasyon karon, kauban si bise gobernador Dionisio Balite ug ang Sangguniang Panlalawigan, gusto niya ma-implementar ang patas nga paghatag sa mga serbisyo ug kaayuhan ngadto sa tanan.

Sa iyang obserbasyon naghitak ang pamolitika sa Cuaming ug angayan na kini nga putlon ang maong sistema. Iyang gimando ang pag-imbestiga bahin sa “No Show” incident sa Cuaming Civic Action. Ang isla Cuaming usa ka barangay nga sakop sa Lungsod sa Inabanga nga kanhi gidominar sa mga Jumamoy.