ANG PAPEL SA MGA KABABAYEN-AN SA ATONG PANAHON KARUN

Kung sa kaniadtong henerasyon, ang mga kababayen-an, nakadestino lamang sa upat ka suok sa usa ka puluy-anan, ron silbihan ang padre de pamilya, ug ang tanan nga anaa sa panimalay , dako na og naabtan ang kausaban nga nagapanghitabo karon. Daghan nang mga kababayen-an ang nahimong mga importanteng haligi sa kasaysayan sa atong nasod.

Sa pagkakaron, ang bantugang ngalan nga sagad unang mahinumduman kung mga inilang kababayen-an ang hisgutan, mao si Hidilyn Diaz. Si Diaz taga Zamboanga City, naghatag ug dakong garbo sa nasod sa dihang nakakuha ang Pilipinas pinaagi kaniya sa unang Gold Medal atol sa Tokyo 2020 Summer Olympics, weightlifting women’s 55 kg. category. Si Gina Ortiz Jones, Filipina, usa ka under secretary sa US Airforce sa pagkakaron. Sa nasod, babaye gihapon ang naghupot sa ikaduhang pinaka-importanteng gahom ug posisyon sa tibuok Pilipinas, si Sara Duterte-Carpio ang bise presidente sa Pilipinas.

Ang Pangagamhanang Probinsyal karon, adunay dako nga tinguha pagpalapad sa papel nga gihuptan sa mga kababayen-an aron makatabang sa pagpauswag sa probinsya sa Bohol. Sa Development Agenda “Strengthening people’s organizations and cooperatives”, ginatan-aw nga hatagan og gibog-aton ang kalihukan sa mga kababayen-an. Sa atong probinsya daghang mga babaye ang nakakuha sa approval sa mga Bol-anon ug karon nahimong mga haligi sa pagpadagan sa probinsya, sama ni Hon. Maria Vanessa C. Aumentado nga nahimong representative sa Second District, Hon. Alexie Tutor representative sa Third District ug daghan pa.

Si Gobernador Erico Aristotle C. Aumentado midasig sa mga benipisyaryo sa Livelihood Assistance Program for Women Associations (LAPWA) sa pagpadayon sa ilang mga kalab-uton aron nga matabangan ang ilang tagsa-tagsa ka pamilya pagbaton ug mas lig-on nga panginabuhi. Ang gobernador miingon nga anaa ang padayon nga pagsuporta sa Pangagamhanang Probinsyal paghatag og pondo aron magamit sa mga asosasyon sa mga kababayen-an.

Niadtong Oktubre 5, 2022, gipahigayon diha sa Bohol Cultural Center ang Ceremonial Turn-Over sa 1109 units ka mga kahimanan sa pagpangluto ngadto sa 331 ka mga barangay sulod sa 17 ka mga lungsod nga benipisyaryo sa LAPWA. Ang head sa Provincial Social Welfare and Development Office (PSWDO) nga si Ms. Carmelita Tecson miingon nga ang mga kahimanan sa pagpangluto magamit panahon kung dunay mga Evacuation Activities, Nutritional Feeding ug uban pang mga kalihukan sulod sa barangay.

Dako ang kalipay nga gibati sa usa ka libo kapin ka mga kababayen-an nga mitambong sa turn-over ceremony tungod sa pagpakabana ni Gob. Aris sa kaayuhan ug katungod sa mga Boholana. Matod pa ni Norma Huit , 60 anyos, lumulupyo sa Baryong Daan, San Isidro, Bohol, “bisan sa kalisod sa panginabuhi karon, pero nalipay gyod mi nga nagpakabana si Gob. Aris sa mga kababayen-an kay makatabang pod ni pagpalambo sa among pamilya ug sa among komunidad.”

Matod pa ni Gob. Aris “ Nasayod kami kung unsa ang papel sa mga kababayen-an, angay kini nga palig-onon kay ang mga babaye makatabang pagpadagan sa ilang mga panimalay. Ang pag-uswag sa probinsya sa Bohol, anaa mag-agad sa mainiton nga suporta sa katawhan.”

Ang maong turn-over gitambungan usab ni Board Member Gloria B. Gementiza ug Board Member Tita Baja. Adunay 778 ka units nga laing kahimanan sa pagpangluto nga ihatag sa laing mga women associations sa second batch.