SERBISYONG HATOD NI GOV. ARIS AUMENTADO SA KALUNGSURAN

Puno sa paglaum ug determinasyon ang panglantaw ni Gobernador Aris Aumentado alang sa mga Bol-anon isip bag-ong gobernador. Desidido kini nga matuman ang iyang gilatid nga Road Map samtang nagpunting sa usa ka direksyon nga mao ang pag-uswag sa iyang probinsya ug pagbaton sa usa ka Limpyong Gobyerno. Iyang gugma ang pakigsandurot sa mga Bol-anon ug pagkahingawa sa ilang kahimtang. Kini ang hinungdan nga nadasig ang gobernador pagsubay sa mga kaigsoonang Bol-anon sa nagkalain-laing lugar sa probinsya pinaagi sa Meet & Greet ug pagpaduol sa mga serbisyo ug programa sa kagamhanang probinsyal ngadto kanila ilabina kadtong anaa sa ubos nga hut-ong sa katilingban.

Gisugdan ni Gobernador Aumentado ang iyang tibuok semana pinaagi sa pag-adto sa kalungsuran nga mao ang Anda, Guindulman, Mabini ug Dimiao, adlawng Lunes Nobyembre 28.

Samtang pagtambong sa usa ka turn-over ang iyang tuyo sa Mabini diin sa iyang paghiabot, iya ra usab kining gitugyan kang Mr. Gil Bongato tungod naapike siya sa oras, parehong mga serbisyo ang iyang gipreparar alang sa laing tulo ka mga lungsod.

Dala sa iyang team ang honorarium alang sa mga BHW, Financial Assistance kantidad P25,000.00 ngadto sa kabarangayan, Honorarium para sa mga BALA, Tanod Kits para sa mga tanod ug canned goods alang sa mga mitambong sa kalihukan. Ginaandam usab ang P40,000.00 alang sa Federated Senior Citizens ug ang P200,000.00 sa sunod tuig alang sa proyekto sa kabarangayan diin igahatag ang maong kantidad ngadto sa tanang barangay sa tibuok probinsya sugod sa sunod tuig ug hangtod makadawat na ang tanan.

Ginaplano na usab ang pag-enrol ngadto sa PhilHealth sa tanang mga barangay officials nga wala maka avail niini. Aduna usab Bereavement Assistance nga hapit na iimplementar agi og tabang sa mahitabuan, kini padayon pa nga gitun-an unsaon pag-improve sa pamaagi sa maong benipisyo.Kining tanan pagakuhaon ang pondo gikan sa Panudlanan sa Probinsya. Busa gihangyo sa gobernador ang suporta nga pag-ampo sa katawhan ngadto sa Labawng Makagagahom aron matuman ang iyang mga larawpaghatag sa patas nga kaayuhan para sa tanan.

Sa lungsod sa Guindulman dili lang ang maong mga serbisyo ang ilang nadawat, tungod kay gipahigayon usab ni gobernador Aris ang turn-over sa lima ka 16 footer nga Fiberglass Paddle Boat alang sa lima ka associations,kauban ang mga fishnets ug mga accessories,ug mga plywood, diin ang pondo niini gikan sa BFAR.

Adunay gipanghatag usab sa matag barangay nga mga chain saw ngadto sa 19 ka barangay, diin gikan sa LGU ang pondo niini.

Gi-ekspresar sa GAA ang iyang dako nga pagpasalamat sa mga kapitanes ug mga ginsakupan niini, ilabina usab ngadto kang Hon. Mayor Albino Balo, Hon. Mayor Angelina B. Simacio ug Hon. Mayor Randolph L. Ang sa ilang init nga suporta sa kalihukan. Gipasalamatan usab niini ang tanang mga partner offices sama sa OPSWD, PHO, LGA, OPV, PTO,PCDO ug uban pa.

Pamahayag sa gobernador nga kung magkahiusa sa pagtinabangay anaa ang pag-uswag.