CEREMONIAL TURN-OVER SA HYBRID RICE SEEDS MALAMPUSONG GIPAHIGAYON SA PILAR

Gipangusgan sa kagamhanang Probinsyal ubos sa liderato ni Gobernador Aris Aumentado ang pag implementar sa mga programa sa Agrikultura nga makahatag ug tubag pagpa-uswag sa produksyon sa humay dinhe sa Probinsya sa Bohol. Gisagop ni Gob. Aris ang Hybrid Rice Production Farm Clustering Approach isip usa ka stratehiya apan, gipalapdan ug gipalig-on sa gobernador aron mas daghang tinuod nga mag-uuma ang makapahimulos niini ug malikayan nga mausik ang salapi sa gobyerno sa dili mao nga katuyuan, kini, isip kabahin sa iyang agenda sa Limpyong Gobyerno.

Ang lead agency nga mao ang Office of the Provincial Agriculture pinaagi ni Larry Pamugas mihimo sa ceremonial turn-over niining Hybrid Rice Seeds Nobyembre 28, didto sa Lungsod sa Pilar, ang lungsod nga gidumala ni Hon. Mayor Wilson Pajo ug Hon. Vice Mayor Datahan ug sa ilang konseho. Sumala sa taho nga sa upat ka RTC sa tibuok Pilipinas apil ang Lungsod sa Pilar sa aktibo nga miresponde pagdawat niining maong programa. Usa sa mga benipisyaryo sa maong programa , mao ang LUMBAY FARMERS ASSOCIATION sa Pilar, Bohol diin atol sa turn-over ilang gidawat gikan sa OPA ang unom ka gatus ka putos (600 packs) nga Binhing Hybrid nga nagkantidad og P720,000.00 (seven hundred twenty thousand pesos).

Kining 620 packs nga binhi igo, alang sa 120 ka ektarya nga basakan nga ginatrabaho sa Lumbay Farmers Association. Gibana-bana nga ang matamnang 120 ka ektarya, muani og 160 ka kaban nga humay. Mga binhi kini nga Longping, Hataw seeds ug sa SL Agri-Tech Corporation. Ang maong pagpananom sa humay iga-monitor sa mga technicians pagsiguro sa maayo nga harvest.

Giekspresar sa mga benipisyaryo ang ilang kalipay ug pagpasalamat sa gobyerno sa ilang nadawat nga kaayuhan, ilabina nga ang 20 porsyento sa ilang abot paliton sa gobyerno sa kantidad P20.00 ang kilo. Ang OPA mismo ang muanha sa mga mag-uuma panahon sa pag-ani aron dili na maglisod ang mga hingtungdang mag-uuma sa transportasyon sa maong paliton nga baynte porsyento sa ilang abot. Kabahin kini sa programang “buy-back system”.

Sumala sa kanunay nga pamahayag sa gobernador, ang mga opisyales sa gobyerno mga instrumento lamang sa Labawng makagagahom pagbubo sa mga grasya ngadto sa katawhan, angay iampo ang kalampusan ngadto kaniya. Ang kalamboan nagagikan usab sa pagtinabangay sa komunidad.